Sharof Rashidov nomidagi Samarqand davlat universiteti rektori, Oʻzbekiston Respublikasi fan arbobi, Oliy Majlis Senati aʼzosi Rustam Xolmurodovning “Xalq soʻzi” gazetasida eʼlon qilingan “Millat uchun hayot-mamot masalasi” maqolasida mamlakatimizning milliy gʻoyasi qanday boʻlishi kerakligi toʻgʻrisidagi fikrlar ilgari surilgan.

Maqolada koʻp yillardan beri aytib kelinayotgan, lekin amalda yoʻq milliy gʻoya toʻgʻrisida asosli fikrlar aytilgan. Ogʻriqli boʻlsa ham tan olish kerakki, bugun ayrim sohalarda ortda qolib borayotganligimizning asosiy sababi taʼlimga eʼtiborning sustligi ekanligidadir. Bu achchiq haqiqatni hamma yaxshi anglab turibdi. Lekin maqola muallifi kabi dadil koʻtarib chiqishga jasorat yetishmaydi. Bugun jamiyatning salohiyatini koʻtarish uchun qilinayotgan ishlar yetarli emas, deb oʻylayman.

Mamlakatni murakkab boʻlgan bunday ijtimoiy-iqtisodiy holatdan faqatgina yuksak salohiyatli kadrlar bilangina qutqarib qolish mumkin. Bunda sifatli shakllantirilgan taʼlim tizimi va samarali ilmiy natijalardan oʻzga najot yoʻq. Taʼlim-tarbiya masalasi nafaqat bir shaxsning ishi, balki butun millatning oldida turgan dolzarb vazifadir.

Maqola muallifi taʼkidlaganidek, milliy gʻoya xalqni yagona maqsad yoʻlida birlashtirishi lozim. Milliy gʻoya hayotimizning mazmunini, maʼnosini tashkil etishi kerak.

Bugun Vatan oldidagi burchimizni, millat oldidagi masʼuliyatimizni yanada chuqurroq anglashimiz kerakligini hayotning oʻzi taqozo etmoqda.
Hamma armonlarimiz, ogʻriqlarimiz, muammolarimiz zamirida bilimsizlik yotganini, bilimsizlik oyogʻimizga kishan boʻlayotganini qachon anglab yetamiz.

Qachon dabdabali toʻy-marakalar qilishga, ortiqcha hoy-havaslarga berilishga, hashamatli uy-joylar qurishga chek qoʻyamiz?
Qachon hamma kuchimizni, imkoniyatimizni bolalarimizni oʻqitishga sarflaymiz? Farzand taʼlim-tarbiyasi hammasidan ustun ekanligini qachon tushunib yetamiz?

Sifatli taʼlim, samarali ilm, salohiyatli avlodni yetishtirish milliy gʻoyamizga aylansagina, hayotimiz oʻzgaradi, mamlakatimiz rivojlanadi, jamiyatimiz sogʻlomlashadi.

Sanjar TILLAYEV,

Samarqand davlat universiteti kimyo fakulteti dekani, dotsent.