Yurtimizda keng nishonlanayotgan Tibbiyot xodimlari kuni arafasida Toshkent tumanidagi 75-oilaviy poliklinikasining yangi binosi foydalanishga topshirildi.

Koʻkterak hududida joylashgan sobiq tuman koʻp tarmoqli markaziy poliklinikasi binosi maʼnan eskirib, aholi va tibbiy personal uchun qator noqulayliklar mavjud edi. 

Muassasa joylashgan bino 3 oy davomida kapital rekonstruksiya qilinib, mutlaqo zamonaviy koʻrinish kasb etdi. Endilikda ushbu tibbiyot maskani 75-oilaviy poliklinika sifatida 30 mingga yaqin aholiga tibbiy xizmat koʻrsata boshlaydi.

Bu yerda konsultativ poliklinika, UTT va klinik laboratoriya, kunduzgi davolash boʻlimlari mavjud boʻlib, zamonaviy jihozlangan poliklinikada 8 nafar umumiy amaliyot shifokori, terapevt, pediatr, xirurg, travmatolog, ginekolog, stomatolog, UTT shifokori kabi tajribali mutaxassislar aholiga yuqori malakali tibbiy xizmatni amalga oshirishadi. 

Shuningdek, ushbu poliklinikada Toshkent tibbiyot akademiyasining oilaviy shifokorlar kafedrasi oʻz faoliyatining yuritadi.

Bundan tashqari ushbu muassasada tez tibbiy yordam shoxobchasi joylashgan boʻlib, aholiga tunu kun xizmat koʻrsatish uchun 2 ta tez tibbiy yordam brigadasi va barcha zamonaviy tibbiy asbob-uskunalar bilan jihozlangan, yurtimizda ishlab chiqarilgan 2 ta Volkswagen Caddy reanimobili xizmatga shay.

Oilaviy poliklinikaning tantanali ochilish marosimida Toshkent viloyati hokimi Davron Hidoyatov, Oʻzbekiston Respublikasi sogʻliqni saqlash vaziri Behzod Musayev, Oʻzbekiston Respublikasi Prezidenti maslahatchisining birinchi oʻrinbosari Laziz Toʻychiyev, tuman hokimi Odilxon Rustamov, tuman Tibbiyot birlashmasi rahbar va masʼul xodimlari hamda nuroniylar ishtirok etdi.