Foto: “Xalq soʻzi”

Rahimjon Abdugʻafurov Namangan viloyatining Uychi tumanida tugʻilib oʻsgan. Ayni paytda Amerika Qoʻshma Shtatlari Jorjiya shtatidagi Emori universitetida professor boʻlib ishlaydi. Islom sivilizatsiyasi boʻyicha zalvorli tadqiqotlari bilan dunyo ilm ahliga tanilgan.

Yurtimizda olib borilayotgan islohotlar, jumladan, Namangandagi keng qamrovli oʻzgarishlar uni ham ona-Vatani ravnaqiga hissa qoʻshishga chorladi. Kuni kecha AQSHdan kelgan R. Abdugʻafurov  viloyat markazida barpo etilayotgan Yangi Namangan shaharchasida boʻldi. Shaharcha loyihasi, bu yerdagi bunyodkorlik ishlari olim rahbarligidagi delegatsiyaga gʻoyatda manzur boʻldi va u oʻz niyatini oshkor etdi. Yaʼni hamyurtimiz ushbu shaharchada bilimli yoshlar soni va sifatini oshirish, ilmga chanqoq navqiron avlod vakillari uchun yana bir zamonaviy oliygoh bunyod etishni maqsad qilmoqda.

R. Abdugʻafurov Namangan viloyati hokimi Shavkat Abdurazzoqov bilan uchrashib, istiqbolli loyihasini taqdim etdi.

Maʼlumot uchun, boʻlajak  Yangi Namangan shaharchasi  hududidan  410 ta koʻp qavatli turar joy binolari, 7 ta maktab, 4 ta bolalar bogʻchasi va boshqa koʻplab infratuzilma inshootlari oʻrin oladi.

Qudratilla NAJMIDDINOV, “Xalq soʻzi”.