«Qo‘rg‘ontepa tumani Ichki ishlar bo‘limi Navbatchilik qismi eshitadi». Bu navbatchilik qismlarida har kuni bir necha marta yangraydigan jumla. Mana shu ikki og‘iz so‘zning o‘zi ilinj bilan qo‘ng‘iroq qilayotgan fuqaroda katta umid uyg‘otadi. Uni eshituvchi, muammosini hal qiluvchi davlat idorasi borligidan ko‘ngli taskin topadi. 

Tuman IIB Navbatchilik qismida 6 nafar xodim faoliyat yuritadi. Shu kuni navbatchilikda bo‘lgan mayor G‘iyosiddin Norinboyev 10 yildan buyon sohada xizmat qiladi. Uning yordamchisi safdor Ro‘zimuhammad Bo‘taboyev esa navbatchilikda besh yillik tajribaga ega xodim. Ikkalasi ham xushmuomalaligi, og‘ir-vazminligi va samimiyligi bilan e’tiborimizni tortdi. Kecha-kunduz turli xil murojaatlarga javob berish, har xil vaziyatdagi fuqarolar bilan muloqotni amalga oshirish oson emas. Lekin bu yigitlarda charchoq alomatlarini sezmadik. Ikkisi ham birdek tetik, o‘z vazifasida shaxdam.

– Bir sutka mobaynida kamida 35–40 ta murojaatni qabul qilamiz. Ularning bir qanchasi «102» xizmati orqali, qolganlari bevosita qo‘ng‘iroqlar asosida kelib tushadi. Tag‘in profilaktika inspektorlari tomonidan taqdim etiladigan arizalar ham bor. Qabul qilingan har bitta murojaat va hujjatni rasmiylashtirib, tegishli bo‘limlarga ijrosini ta’minlashga yo‘naltiramiz. Qilingan hech bir murojaat yechimsiz qolmasligi kerak, – deydi mayor G‘iyosiddin Norinboyev. 

Xizmat jarayonini kuzatish davomida shunday holatga guvoh bo‘ldik. Navbatchilar bir muddat ham chalg‘imay, butun diqqat-e’tiborini ishga qaratmoqda. Ular xuddi shunday diqqat-e’tibor, 24 soat sergaklik bilan o‘z xizmat vazifasini ado etishadi. 

«Navbatchilik qismi – ichki ishlarning yuragi», deyishadi. «Yurakning muntazam sog‘lom urishini ta’minlash esa bizning burchimiz». Bu fikr Qo‘rg‘ontepa tumani IIB Navbatchilik qismi mas’uliyatli xodimlarining kundalik shioriga aylangan. 

Nigora TO‘XTAMATOVA, 

o‘z muxbirimiz.

Andijon viloyati.