Oliy Majlis Qonunchilik palatasi Spikeri o'rinbosari, «Milliy tiklanish» demokratik partiyasi fraktsiyasi rahbari Alisher Qodirov bu haqida, jumladan, shunday deb yozadi:

"Vengriya 18 yoshgacha bolalarga LGBT g'oyalarini targ'ib qilish mumkin emasligi haqida qonun qabul qildi.

Shu sabab Evropa Ittifoqiga aʻzo mamlakatlar tomonidan Vengriyaga nisbatan jiddiy taʻsir choralari ko'rishgacha bo'lgan chaqiriqlar, tanqidlar yangramoqda.

Shveytsariyada hijob o'rashni taqiqlash bo'yicha qonun qabul qilinganida hamma olqishlagan edi.

Rostdan ham Evropada yashayotgan insonlar shu qadar dindan nafratlanadilaru, bejinslarga hurmatlari shunchalar balandmi?

Tahlillarga qarasangiz EIga aʻzo davlatlarning deyarli barchasida aholining asosiy qatlami tomonidan LGBT g'oyalari qo'llab-quvvatlanmaydi, kamida «mendan uzoqroq yursa bo'ldi» qabilida yondashuv. Shveytsariyada esa, bilishimcha, Evropaning eng bag'rikeng xalqi yashaydi.

Nima demoqchiman?

Jamiyatda ustuvor talab nima ekanligini odamlar belgilamay qo'yganiga 20 yillar bo'ldi, menimcha. Ijtimoiy tarmoqlarda oqni qora, qorani oq qilib yuborish texnologiyasi muvaffaqiyat bilan ishlatilmoqda. Besh so'm pul yoki beshta follover ilinjida bilib yoki bilmay bu tizimga ishlab yotganlar qancha…

Axborotni isteʻmol qilish PIRAMIDASI haqida gapirgandim. O'qib ko'rarsiz…

Berilgan axborotni o'qimasdan isteʻmol qilish, yolg'on xabar ekanligini bilib turib eʻtiborsiz qoldirish yoki shaxsiy g'arazdan kelib chiqib qoralashda ishtirok etish sizni bu tizimning xizmatkori ekanligingizni yaqqol isbotidir.

Sizga yoqmagan yoki siz xato deb hisoblagan xabarni rad eting va bu haqida munosabat bildiring. Albatta madaniyat bilan. Haqorat uchun 4,9 mln.so'mdan 49 mln.so'mgacha jarima yoki ozodlikdan mahrum qilishgacha javobgarlik belgilangan. Sizni hyech kim shikoyat qilmagani ertaga ham shikoyat qilmasligini kafolatlamaydi.

Faqat shu shaklda dunyoni trollar boshqarishiga qarshilik ko'rsatishimiz mumkin".