14-iyun kuni AQSH poytaxti Vashington shahrida Amerika armiyasining 250 yilligi munosabati bilan keng koʻlamli harbiy parad tashkil etildi. Ushbu tantanali tadbir mamlakat prezidenti Donald Trampning 79-yillik tugʻilgan kuni bilan bir vaqtda boʻlib oʻtdi. Prezident Tramp va uning rafiqasi Melaniya paradga shaxsan tashrif buyurib, tadbirni tribuna orqali kuzatdi hamda nutq soʻzladi.

Mahalliy OAV xabarlariga koʻra, paradda 6600 nafarga yaqin harbiy xizmatchi, 50 ta harbiy vertolyot va 'M1 Abrams' jangovar tanklari ishtirok etdi. Shu munosabat bilan shaharda xavfsizlik choralari kuchaytirildi. Tomoshabinlar orasida Amerika bayroqlari koʻtarilgan boʻlib, koʻpchilikning boshida 'Amerikani yana buyuk qilamiz' ('Make America Great Again') yozuvi tushirilgan qizil kepkalar boʻlgan.

Prezident Tramp harbiy parad doirasida yangi askarlar va armiyaga qaytgan harbiy xizmatchilarni tantanali tarzda qasamyodga keltirdi. U oʻz murojaatida: 'Qoʻshma Shtatlar armiyasiga xush kelibsiz! Hayotingizda omad yor boʻlsin', ' deya minnatdorchilik bildirib oʻtdi.

Biroq harbiy tantanalar fonida mamlakatning bir qancha yirik shaharlarida Donald Trampning siyosatiga qarshi ommaviy norozilik namoyishlari ham boʻlib oʻtdi. 'No Kings' ('Podshohlar kerak emas') shiori ostida oʻtkazilgan mitinglar Trampning avtokratiyaga moyil siyosati, milliarderlar manfaatini koʻzlash va AQSH demokratiyasining militarizatsiyalashuviga qarshi yoʻnaltirilgan edi. Ushbu noroziliklar aynan prezidentning tugʻilgan kuniga toʻgʻri kelganligi bilan eʼtiborga molik.

Eslatib oʻtamiz, Tramp oʻzining birinchi prezidentlik davrida ham shunday parad oʻtkazishni istagan edi. 2017-yilda u Fransiya prezidenti Emmanuyel Makronning taklifiga binoan Parijda Bastiliya kuni paradini tomosha qilganidan soʻng, AQSHda ham shunday tadbirni tashkil etishni rejalashtirgan. Biroq bunday paradning xarajatlari 90 million dollarga teng boʻlishi aniqlangach, bu reja amalga oshirilmagan edi.