Qonun bilan Jinoyat kodeksiga binolar va inshootlardan foydalanishga doir ruxsatnoma berish hamda ularni foydalanishga qabul qilib olish qoidalarini buzganlik, shaharsozlik sohasidagi vakolatli davlat organlarining ruxsatisiz obyektlarni qurganlik, qonunchilikni buzgan holda koʻp kvartirali uylardagi tayanch konstruksiyalarni oʻzgartirganlik va (yoki) rekonstruksiya qilganlik, shuningdek binolar va inshootlarni aholi punktlarining tasdiqlangan bosh rejalari, ularni rejalashtirish va qurish loyihalarini buzgan holda loyihalashtirganlik, rekonstruksiya qilganlik va qurganlik uchun javobgarlik yuzaga kelishini nazarda tutuvchi oʻzgartirishlar kiritilmoqda.

Ushbu huquqbuzarliklar uchun jinoiy javobgarlik, avval maʼmuriy javobgarlik choralari koʻrilgandan keyin qoʻllaniladi. Agar qonunbuzar noqonuniy oʻzgartirishlarni oʻz xohishi bilan tiklasa, u javobgarlikdan ozod etilishi mumkin.

Bundan tashqari, Odam oʻlishiga yoki boshqa ogʻir oqibatlarga sabab boʻlgan tarzda shaharsozlik toʻgʻrisidagi qonunchilikni buzganlik uchun alohida jinoyat javobgarlik kiritilmoqda.

Shuningdek, loyiha tashkilotlarining koʻrsatmalariga rioya qilmagan qurilish buyurtmachilari javobgarlikka tortiladi. Shaharsozlik hujjatlarisiz qurilish ishlari olib borgan shaxslarga nisbatan ham qatʼiy choralar koʻriladi va qoidalarini buzganlik uchun belgilangan jarimalar miqdori oshiriladi.

Taʼkidlash joiz, qonun rasmiy eʼlon qilingan kundan eʼtiboran 3 oy oʻtgach kuchga kiradi.