Sportga qadam qo‘ygan har bir yosh yigit-qizning bir orzusi bor: u ham bo‘lsa chempion bo‘lish, jahon arenalarida vatanimiz bayrog‘ini yuksaklarga ko‘tarish.

Azizbek orzusiga yetishish uchun tinmay harakat qilmoqda. Bugungi kunda Ichki ishlar vazirligining 1-sonli Toshkent akademik litseyning 2-bosqichda tahsil olayotgan Azizbek Bahodirov 2–6-oktabr kunlari Toshkent shahrida sportning muay-tay turi bo‘yicha «O‘zbekiston kubogi» uchun kurashilgan musobaqada 67 kg vazn toifasida faxrli 2-o‘rinni qo‘lga kiritdi.

Azizbek Bahodirov 2007-yilning 14-may kuni Toshkent shahrida tug‘ilgan. U yoshligidan muay-tay sport to‘garagiga muntazam qatnashib kelmoqda. Osiyo chempioni.

Azizbek ayni damda litseyda qunt bilan bilim olish bilan birga tajribali murabbiylari ko‘magida sportda, o‘qishida oliy o‘quv yurtiga kirish uchun tinmay harakat qilmoqda.

Uning orzulari bisyor. Kelajakda jahon chempionatida oltin medalga ega bo‘lish, shuningdek, IIV Akademiyasida o‘qishni davom ettirish.

Shuni alohida ta’kidlash lozimki, litsey o‘quvchilari orasida yosh iqtidorli sportchilar safi yil sayin kengayib bormoqda. Tomirida buyuk ajdodlar qoni jo‘sh urayotgan Azizbek kabi sportga ixlosmand dovyurak yoshlari­mizning bundanda yuksak marralarni egallashi­ga, albatta, ishonamiz.

Madina QAHHOROVA,

o‘z muxbirimiz.

Toshkent shahri.