Amerikaning mashhur ESPN sport nashri bokschilar oʻrtasida vazn toifasidan qatʼi nazar tuzilgan eng kuchli 10 nafar sportchi roʻyxatini eʼlon qildi. Nashrga koʻra, reytingning birinchi oʻrnini ukrainalik bokschi Aleksandr Usik egalladi. Bu bilan u nafaqat ogʻir vazn toifasida, balki umumiy kuchli sportchilar orasida ham yetakchi sifatida eʼtirof etildi.

Aleksandr Usik shu kungacha 23 ta jang oʻtkazib, ularning barchasida gʻalaba qozongan. Ikkinchi oʻrinni yaponiyalik Naoya Inoue egalladi. U ham 30 ta jangda yengilmaslik seriyasini saqlab qolmoqda. Kuchli uchlikni esa amerikalik bokschi Terens Krouford yakunlab berib, uning hisobida 41 gʻalaba bor.

Toʻrtinchi pogʻonani rossiyalik Dmitriy Bivol egallagan boʻlsa, beshinchi oʻringa yana bir rossiyalik, Artur Beterbiyev joylashgan. Ikkalasi ham soʻnggi yillarda oʻzining yuqori darajadagi texnikasi va zarba kuchi bilan tanilgan sportchilardir.

Oltilikda Jessi Rodriges joy oldi ' u hozirgacha 21 ta jangda magʻlubiyat koʻrmagan. Yettinchi oʻrinda Meksika afsonasi Saul 'Kanelo' Alvares turibdi. U 69 ta gʻalaba, 2 magʻlubiyat va 2 durang bilan reytingda oʻz mavqeini saqlab qolmoqda.

Sakkizinchi oʻrin amerikalik David Benavidesga nasib etdi. U ham hali magʻlubiyat nimaligini bilmagan. Reytingni yaponiyalik Dzunto Nakatani (30-0) va amerikalik Shakur Stivenson (23-0) kabi tengi yoʻq bokschilar yakunlab berdi.

ESPNning bu reytingi bokschilar orasida sport formasi, texnik ustunlik va ringdagi gʻalabalar asosida tuzilgan boʻlib, muxlislar va mutaxassislar orasida qizgʻin bahslarga sabab boʻlishi kutilmoqda.