Qo‘ng‘irot tumani «Jasliq» posyolka fuqarolar yig‘ini chegara oldi hududlaridan biri hisoblanadi. Har kuni bu yerdan yuzlab insonlar kirib–chiqishadi. Shu boisdan ham xizmat olib borayotgan ichki ishlar xodimlaridan doimo hushyorlik talab qilinadi. 

Bu yerda joylashgan Bo‘ston temir yo‘l bekati hududidagi vaziyatni kuzatish uchun aylanishga chiqqan mayor Ataqo‘zi Qurbanbayevning yo‘lovchilar orasida ikki ayol e'tiborini tortdi. Bir qaraganda boshqa yo‘lovchilar kabi ko‘ringani bilan, ularning biri atrofga hadik bilan qarab qo‘yardi. 

Bundan shubhalangan mayor A.Qurbanbayev ularning nima bilan mashg‘ul ekanligini tekshirib ko‘rishga qaror qiladi. U adashmagandi, ayollardan biri noqonuniy valyuta ayriboshlash bilan shug‘ullanayotgan ekan. 

Albatta, bu oddiy holatdek ko‘ringani bilan bugungi kunda qalbaki pul mablag‘lari muomalaga kirib kelish ehtimoli yuzaga kelishi hech kimga sir emas. Natijada esa, firibgarlarga chuv tushib qolish mumkin.

Qahramonimiz A.Qurbanbayev 1983- yili Amudaryo tumani Mang‘it shahrida tavallud topgan. Dastlabki faoliyatini 2006-yili Qoraqalpog‘iston Respublikasi Qo‘ng‘irot tumani IIB huzuridagi Qo‘riqlash bo‘linmasi milisioneri bo‘lib ishlashdan boshlaydi. 2008-2012-yillarda O‘zbekiston Respublikasi IIV Toshkent oliy harbiy-texnik bilim yurtida ta'lim oladi. 2012–2019-yillarda Qoraqalpog‘iston Respublikasi IIV 81 sonli, 71 sonli koloniyalarida tezkor vakil bo‘lib ishlaydi. 

2019-yildan ayni kunga qadar Qoraqalpog‘iston Respublikasi Transportda xavfsizlikni ta'minlash boshqarmasi Bo‘ston bekati bo‘linmasi boshlig‘i lavozimida ishlab, tinchlik–osoyishtalikni ta'minlash, fuqarolar xavfsizligini ta'minlashda shuningdek, turli qonunbuzarlik va jinoyatchilikning oldini olishda munosib hissa qo‘shib kelmoqda.

Xususan, o‘tgan 2023-yilda hududda faqatgina 2 ta noqonuniy valyuta ayriboshlash va 1 ta ma'muriy javobgarlik holat aniqlandi. 

Azamat PIRNIYAZOV,

O‘z muxbirimiz 

Qoraqalpog‘iston Respublikasi.