Lochinbek 8-sinfda o‘qib yurgan kezlari sportning o‘zbek jang san’ati va karate turlari bo‘yicha dastlab tuman va viloyat birinchiliklari­da g‘olib bo‘ldi. Keyinchalik mamlakat va xalqaro miqyosdagi musobaqalarda ham sovrinli o‘rinlarni egalladi. 

U 9-sinfni tugatish arafasida ota-onasi bilan maslahatlashib, IIV Navoiy akademik litseyiga hujjat topshirdi. Hozirda 2-kursda tahsil olmoqda. 

Lochinbek Sa’dullayevning sportdagi yutuqlariga batafsilroq to‘xtaladigan bo‘lsak, o‘zbek jang san’ati bo‘yicha o‘z vazn toifasida 2018-yilda bo‘lib o‘tgan xalqaro musobaqada va 2019-yilgi O‘zbekiston chempionatida 1-o‘rinni egalladi. 2019-yilda Rossiyada yoshlar o‘rtasida karate bo‘yicha tashkil etilgan xalqaro turnirda 2-o‘rin sohibi bo‘ldi. Shu yili o‘zbek jang san’ati bo‘yicha Osiyo chempionatida unga faxrli 3-o‘rin nasib etdi. Ushbu sport turi bo‘yicha 2020-yilgi mamlakat chempionatida yana shohsupaning eng yuqori pog‘onasiga ko‘tarildi. 2022-yilgi Osiyo chempionatida esa ilgarigi mavqeini yaxshilab, kumush medal sohibi bo‘ldi. 2022-yilgi mamlakat chempionatida yana chempionlik mavqeini saqlab qoldi. Qozog‘istonda o‘zbek jang san’ati bo‘yicha bo‘lib o‘tgan Jahon kubogi musobaqasida 2-o‘rinni egalladi. Bu ro‘yxatni yana davom ettirish mumkin.

Lochinbek akademik litseyda fanlardan «a’lo» o‘qishi bilan bir qatorda, jamoat ishlarida faol ishtirok etadi. U sport musobaqalarida muntazam qatnashib, faxrli o‘rinlarni egallab kelmoqda. Maqsadi – IIV Akademiyasiga o‘qishga kirib, kelgusida jinoyat qidiruv xodimi bo‘lish. Unga orzusi amalga oshishida tilakdoshmiz. 

Otabek SHAMSIYEV,

IIV Navoiy akademik litseyi o‘qituvchisi, 

iste’fodagi podpolkovnik.

MUALLIF TO‘G‘RISIDA

Otabek Shamsiyev 1973-yili Navoiy viloyati Qiziltepa tumanida tug‘ilgan. 1996-yildan 2017-yilgacha Navoiy viloyati ichki ishlar organlarida turli lavozimlarda xizmat qilgan. Jumladan, 2009 – 2017-yillarda viloyat IIB Huquqbuzarliklarning oldini olish boshqarmasi boshlig‘i lavozimida faoliyat ko‘rsatgan. O‘zbekiston Respublikasi Prezidentining 2013-yil 23-oktabrdagi farmoniga ko‘ra «Sodiq xizmatlari uchun» medali bilan taqdirlangan.