Bugun, 14 may kuni Farg‘ona viloyatida o‘tkir osti sklerozlashgan panensefalit kasalligiga chalingan 5 yoshli bola vafot etdi. Bu haqda u bilan birga davolanayotgan boshqa bolalarning ota-onasi QALAMPIR.UZ’ga ma’lum qildi.

Xabar berishlaricha, bolakay 2019 yilning sentyabr oyida Farg‘ona viloyati Furqat tumanida sog‘lom holda dunyoga kelgan. 2023 yilda qizamiq asorati tufayli 10 mingtadan 1 bolada kelib chiquvchi o‘tkir osti sklerozlashgan panensefalit (SSPE) xastaligiga chalingan. Farg‘ona tuman tibbiyot birlashmasi bolakay reanimatsion holatda bo‘lishiga qaramay, uning ota-onasiga o‘g‘lini uyiga olib ketishini aytgan. 

SSPE kasalligiga chalingan o‘nlab bolalarning ota-onalari QALAMPIR.UZ’ga ma’lum qilishicha, bemor bolakaylarni davolashda davlat tomonidan hech qanday yordam ko‘rsatilmayapti. Og‘ir ahvoldagi bolalar tibbiy yordam va shifokor nazoratisiz o‘z uylarida saqlanmoqda. Respublika Bolalar Milliy tibbiyot markazi esa bolalarni order asosida har 3 oyda 10 kungina olib qoladi. Sog‘liqni saqlash vazirligi bolalarni zarur bo‘lgan dorilar bilan ta’minlamayapti.

Ma’lumot o‘rnida, SSPE qizamiq yoki qizilcha kasalligidan qolgan asoratlar tufayli yuzaga keladigan miya kasalligidir. Bemorda to‘xtovsiz sudurgi, mushaklar tortishishi yoki bo‘shashishi kuzatiladi. Uning oldini olishning yagona usuli qizamiqqa qarshi emlashdir. O‘zbekistonda bolalar 1 yoshdan boshlab qizamiqqa qarshi emlanadi, ammo ko‘p hollarda bolalar yoshiga yetmasdan ushbu kasallikka chalinmoqda. Shu boisdan, O‘zbekistonda SSPE kasalligiga chalinish holati so‘nggi yillarda avj olgan (Bu haqda keyinroq QALAMPIR.UZ’ning maxsus reportajini tomosha qiling).

Eslatib o‘tamiz, avvalroq O‘zbekistonda SSPE bilan kasallangan bolalar soni 100 ga yaqinlashgani haqida xabar bergan edik. Bu anomal hodisa hisoblanadi.