Amerika Qo‘shma Shtatlari o‘z qo‘shinlarini Suriyadan olib chiqmaydi. Bu haqda AQSH Davlat kotibining siyosiy masalalar bo‘yicha o‘rinbosari Viktoriya Nuland CNN Turk telekanaliga bergan intervyusida ma’lum qildi. 

"Qo‘shma Shtatlar Suriyadan qo‘shinlarini olib chiqmayapti. Kecha Istanbuldagi cherkovda sodir etilgan fojiali voqealar shuni ko‘rsatdiki, ISHID hali ham ko‘p joylarda faol. Biz Turkiya bilan terrorizmga qarshi kurash borasida o‘nlab yillar davomida hamkorlik qilamiz", deydi u.

Nulandning ta’kidlashicha, AQSH va Turkiya uchun terrorizmga qarshi kurash bo‘yicha hamkorlikni kuchaytirish har qachongidan ham muhimroq, “garchi tomonlar har doim ham kurash qanday olib borilishi kerakligi borasida kelishmasa ham”.

“Bu kecha Istanbulda yaqqol namoyon bo‘ldi, bu bizning Iordaniyadagi kuchlarimiz misolida ham ko‘rinib turibdi. Shuning uchun biz bir-birimizga muhtojmiz. Biz gaplashgan narsalardan biri terrorizmga qarshi kurashda hamkorlikni kuchaytirish va Suriyada qanday qilib oldinga siljish bo‘yicha muloqot qilish edi, chunki har ikki tomonning ham, ayniqsa, terrorizmga qarshi kurash masalasida muhim manfaatlari bor”, deya ta’kidlaydi AQSH Davlat departamenti vakili.

Eslatib o‘tamiz, oldinroq “Foreign Policy” jurnali Davlat departamenti va Pentagondagi manbalarga tayanib, Vashington Amerika qo‘shinlarini Suriyadan to‘liq olib chiqish imkoniyatini ko‘rib chiqayotganini yozgandi. Turkiyaning “Hürriyet” gazetasi esa Anqara Amerika qo‘shinlarining Suriyadan olib chiqish rejalari haqidagi xabarlarga ehtiyotkorlik bilan yondashishini xabar qilgandi. Qayd etilishicha, Turkiya AQSHning nafaqat Suriyadan, balki butun Yaqin Sharqdan ham chiqib ketishga intilish tendensiyasini ko‘rmoqda.