O‘zbekiston 2022-yilda ilk bor Venetsiya zamonaviy san’at biyennalesida ishtirok etmoqda. Bu haqda Madaniyat va san’atni rivojlantirish jamg‘armasi axborot xizmati “Daryo”ga ma’lum qildi.

Ta’kidlanishicha, Venetsiyadagi 59-Xalqaro zamonaviy san’at biyennalesi doirasida Madaniyat va san’atni rivojlantirish jamg‘armasi Space Caviar arxitektura-tadqiqot studiyasi va kuratori Sheida Gomashi tomonidan yaratilgan “Dixit Algorizmi – bilimlar bog‘i” loyihasini taqdim etyapti.

“O‘zbekiston pavilyoni olim va mutafakkir Muhammad ibn Muso al-Xorazmiyning ijodini aks ettiradi. Pavilyonda texnologiyaga oid turli nuqtayi nazarlar taqdim etiladi va bu hodisaning xilma-xilligi, chuqurligi va murakkabligi keng jamoatchilik dasturi ishtirokchilari tomonidan muhokama qilinadi”, — deyiladi jamg‘arma xabarida.

Madaniyat va san’atni rivojlantirish jamg‘armasi kengash raisi o‘rinbosari Saida Mirziyoyevaning ta’kidlashicha, O‘zbekiston Venetsiya biyennalesida ikkinchi bor ishtirok etmoqda.

Bu safar buyuk olim Muhammad ibn Muso al-Xorazmiy merosidan ilhomlangan holda “Dixit Algorizmi – The Garden of Knowledge” loyihasini taqdim etmoqdamiz. Bu yilgi pavilyonimiz “Bilimlar bog‘i”ga aylandi. Unda o‘zbekistonlik rassomlar, kurator va san’atshunoslar boshqa yurtlardan kelgan hamkasblari bilan uchrashib, yangi g‘oyalarni muhokama qilib, tajriba almashadi.

Butun ko‘rgazma davomida pavilyonimizda o‘zbek va xalqaro mutaxassislar ishtirokidagi boy ommaviy madaniy dastur taqdim etiladi. Dasturning birinchi qismida O‘zbekistondan 14 nafar ijodkor qatnashadi. Nomoddiy meros ko‘rgazmasi, olamga falsafiy nazar, odamzodning o‘y-xayolini qamrab olgan mulohazalar... Bularni ko‘rishning imkoni yo‘q, ammo his qilish mumkin.

G‘oya va maqsadlarimiz ijod ahli qalbidan joy egallashiga umid qilgan holda, mehmonlarga xush kelibsiz, deymiz, — dedi Saida Mirziyoyeva.

Madaniyat va san’atni rivojlantirish jamg‘armasi ijrochi direktori Gayane Umerova kurator Sesiliya Alemaniy tomonidan tanlangan mavzu jamg‘armaning g‘oyalari va zamonaviy san’at sohasidagi joriy yo‘nalishiga mos kelishidan juda mamnunligini qayd etdi.

“Chunki biz faoliyatimizning barcha jabhalarida fanlararo yondashuvni targ‘ib qilishga intilamiz. Ko‘rgazmaning butun davri davomida pavilyonda ilmiy-ommabop va yuqori ixtisoslashtirilgan tadbirlarning boy dasturi bo‘lib o‘tadi.

Pavilyon maydonida butun dunyodan taniqli rassomlar, kuratorlar va zamonaviy san’at nazariyotchilari, shuningdek, O‘zbekistondan yosh rassomlar va kuratorlar yig‘iladi. Dastur doirasida suhbatlar, chiqishlar va an’anaviy o‘zbek she’riyati tanlovi o‘tkaziladi”, — deydi Gayane Umerova.

Qayd etilishicha, ko‘rgazma 23-apreldan 27-noyabrga qadar davom etadi.