15-dekabr kuni Janubiy Koreyada koronavirusga chalinish bo‘yicha yangi holatlar va ahvoli og‘ir bemorlar soni rekord darajaga ko‘tarildi, deb yozadi “Interfaks”.

Koreya Kasalliklarni nazorat qilish va oldini olish agentligi (KDCA) ma’lumotlariga ko‘ra, o‘tgan sutka davomida mamlakatda yana 7850 kishida COVID-19 qayd etilgan. 15-dekabr, chorshanba kungi ko‘rsatkich avvalgi chorshanba kuni o‘rnatilgan antirekordni yangiladi — o‘shanda 7174 kishida infeksiya aniqlangandi. Chorshanba kuni ahvoli og‘ir bemorlar soni ham rekord ko‘rsatkichni — 964 kishini tashkil etdi. 70 nafar bemor koronavirusdan vafot etdi.

Shu bilan birga, mamlakatda “omikron” shtammiga chalinish bo‘yicha yana to‘qqizta holat aniqlanib, mamlakatda ushbu shtamm bilan kasallanganlarning umumiy soni 128 nafarga yetdi.

Janubiy Koreya bosh vaziri Kim Bu Gemning ta’kidlashicha, hukumat virusning tez tarqalishiga qarshi kurashish uchun xususiy yig‘ilishlar ishtirokchilarining maksimal sonini yanada qisqartirish va komendantlik soatlarini tiklash masalasini ko‘rib chiqmoqda.

“Hukumat hozirgi virusli vaziyatni juda jiddiy deb hisoblaydi va ijtimoiy masofaning yanada kuchli sxemasini amalga oshirishni rejalashtirmoqda” — dedi Janubiy Koreya bosh vaziri COVID-19 ga qarshi kurash bo‘yicha hukumat yig‘ilishida.

COVID-19 ga qarshi kurashning yangi choralari tafsilotlari 17-dekabr kuni e’lon qilinishi va keyingi ikki hafta ichida ishga tushirilishi kutilmoqda. Hozirda xususiy yig‘ilishlar poytaxt hududida olti kishi va boshqa joylarda sakkiz kishi bilan cheklangan. Yangi chora-tadbirlar yig‘ilish ishtirokchilarining ruxsat etilgan sonini to‘rttaga kamaytirishi, restoran va kafelarning ishini soat 22:00 yoki yarim tungacha cheklashi kutilmoqda.

Avvalroq Janubiy Koreyada O‘zbekiston fuqarosi “omikron” shtammini yuqtirib olgani haqida xabar berilgandi.