Harbiy xizmatni Farg‘onadagi xalqaro aeroportda a’lo darajada o‘tagan lavhamiz qahramoni 2019-yili Rossiya Federatsiyasi IIV huzuridagi Belgorod yuridik institutiga o‘qishga qabul qilindi. Huquqshunoslikning nazariy sirlarini puxta o‘zlashtirgan Firdaus Panjiyev yurtga qaytganidan so‘ng Sirdaryo tumani IIB huzuridagi Tergov bo‘limi surishtiruvchisi lavozimida xizmatni boshladi. 

Albatta, boshida qiyin bo‘ldi. Rossiyaning o‘rmonga chulg‘angan shahrida o‘rgatilgan kazuslar, jinoyatni ochishga oid seminarlarda u doim faol bo‘lardi. Lekin nazariya boshqa, amaliyot boshqa ekan. Shuning uchun yosh leytenant talabalik yillari amaliyotga kelganida tanishgan Yangiyer shahar IIB huzuridagi Tergov bo‘limi katta tergovchisi, podpolkovnik Habib Bozorovdan maslahat so‘rab turadigan bo‘ldi. Ustozlar ko‘magida surishtiruv-tergov sirlarini tez o‘zlashtira boshladi. 

O‘tgan yil iyun oyida Sirdaryo tumani IIB huzuridagi Tergov bo‘limiga tergovchi etib tayinlangan katta leytenant Firdaus Panjiyevning mas’uliyati endi yanada oshgan. 

Yaqinda yosh tergovchi tomonidan firibgarlikka oid jinoyat ishi muvaffaqiyatli fosh etildi. Toshkent shahrida istiqomat qiluvchi J.N. Sayxunobod tumanidagi xizmatdosh do‘sti S.E. bilan o‘zaro til biriktirib fuqaro K.A.ning ishonchiga kiradi. Ular 2 kishiga haydovchilik guvohnomasi olib berishni va’da qilib, jami 800 AQSH dollari miqdorida pul olishadi. Oradan olti oylar o‘tgach ham va’da bajarilmagach, fuqaro K.A. Sirdaryo tumani IIBga murojaat qiladi. Ariza asosida jinoiy ish qo‘zg‘atilib, yuqoridagi ikki shaxs topib keltiriladi. Tergov-surishtiruv jarayonida ular o‘z ayblarini tan olishiga to‘g‘ri keldi. Bunda anchagina shakllanib, tajribasi ortgan Firdausning qat’iyati katta rol o‘ynadi. 

Abdurahmon MUSTAFOQULOV,

o‘z muxbirimiz. 

Sirdaryo viloyati.