Izquvarlar jinoyatlarni fosh etishda biri ikkinchisiga zanjirdek bog‘langan holatlarni sinchiklab o‘rganishadi. Yoki surishtiruv jarayonida mutlaqo kutilmagan voqeliklar ham sodir bo‘lib turadi.

Uchqo‘rg‘on tumani IIB Tezkor-qidiruv xizmati Jinoyat qidiruv bo‘linmasi tezkor vakili, kapitan Adhamjon Mashrabboyev 2023-yilda fosh etilmagan o‘g‘rilik jinoyatini ochish maqsadida jinoyat ishlari bo‘yicha Uchqo‘rg‘on tuman sudi tomonidan chiqarilgan ajrimga asosan, gumonlanuvchining izidan tushib, tumanda istiqomat qiluvchi yana boshqa bir fuqaro 1968-yilda tug‘ilgan R.K. xonadonida tintuv o‘tkazadi. 

Tezkor xodimning kutilmagan tashrifi R.K.ni shoshirib qo‘ydi. Tekshiruv jarayonida uning xonadonidagi temir seyfdan 11 nafar shaxsga tegishli fuqarolik pasportlari, 6 dona avtotransport vositalarini qayd etish guvohnomasi, yana shuncha haydovchilik guvohnomasi, 1 donadan «Iphone 14» va «Redmi» rusumli telefon apparatlari va 1 juft sirg‘a borligi aniqlanib, tegishli tartibda rasmiylashtirib olindi. R.K. fuqarolarga foizga pul berib, ushbu buyum va hujjatlarni garov sifatida saqlab kelayotganligi ma’lum bo‘ldi. 

Mazkur holat yuzasidan tergovga qadar tekshiruv jarayonlari boshlandi. Shundan so‘ng R.K. chora ko‘rmaslik va ishni uning foydasiga ijobiy hal qilib berish evaziga jinoyat qidiruv xodimiga bir necha bor pora taklif qildi. Xodim unga bu ishi qonunga xilof ekanini tushuntirsa hamki, eshitishni xohlamadi. 

O‘tkazilgan tezkor tadbir davomida fuqaro R.K. kapitan A. Mashrabboyevga 300 AQSH dollari miqdoridagi pullarni pora tariqasida berayotgan vaqtida tadbir ishtirokchilari tomonidan ashyoviy dalillar bilan qo‘lga olindi. Xodimning vijdoni bunday nomaqbul taklifni qabul qilmadi. 

Hozirda mazkur holat yuzasidan tergovga qadar tekshiruv harakatlari olib borilmoqda. 

Gulchehra BUVAMIRZAYEVA,

o‘z muxbirimiz.

Namangan viloyati.