Suyunchi yoki ulug‘ shoir bilan qisqa va unutilmas uchrashuv

Hozirgidek esimda. 2000-yilning yoz oylari edi. IIV Shaxsiy tarkib bilan ishlash xizmati xodimlarni tarbiyalash, ijtimoiy himoya qilish bo‘limida inspektor lavozimida leytenant unvonida xizmat qilardim.

Bir kuni ustozim, polkovnik O‘tkir Jo‘rayev meni xonalariga chaqirdilar. Kirsam, biz sevgan taniqli shoir Muhammad Yusuf bilan gaplashib o‘tirgan ekanlar. Marhum O‘tkir aka she'riyatni juda yaxshi ko‘rardilar, o‘zlari ham doim bo‘sh vaqtlarida ijod qilganlari uchun atroflarida shoirlar, xonandalar bo‘lardi. O‘shanda O‘tkir Parmonovich menga Muhammad Yusufning bir she'rini komp'yuterda terishda yordam berishim kerakligini aytdilar. Birpasda she'r tayyor bo‘ldi.

Qisqa fursat ichida shunday bir ajoyib ijod mahsuli yaraldiki, men shunda ijodkorning buyukligiga yana bir bor qoyil qolgandim. Keyinchalik she'rga ohang va jilo bergan qo‘shiq O‘zbekiston xalq artisti Nuriddin Xaydarov ijrosida respublika ko‘rik-tanlovida yangradi. 

...O‘sha kuni Muhammad Yusuf shoshilib turgan ekanlar, sababini so‘raganimda ichki bir hayajon bilan: 

– Bugun nabiralik bo‘ldim! Birinchi suyunchini esa, mana, siz berdingiz! – deya hazillashib, she'r bitilgan qog‘ozga ishora qildilar...

Bernora SADIKOVA,

polkovnik.