Bugun, 17 yanvar kuni Xalq deputatlari Buxoro viloyati Kengashining 90-sessiyasi bo‘lib o‘tdi va unda o‘tgan yilning dekabr oyida qamoqqa olingani aytilgan Markaziy bankning Buxoro viloyatidagi bosh boshqarmasi boshlig‘i Erkin Mansurov ham qatnashdi. Buni viloyat hokimligi tomonidan e’lon qilingan fotosuratlar ham tasdiqlab turibdi.
Sessiyada viloyat hokimi Botir Zaripov, viloyat prokurori Mahmud Istamov, viloyat IIB boshlig‘ining o‘rinbosari - jamoat xavfsizligi xizmati boshlig‘i O‘ktam Askarov, viloyat boshqarmalari, tashkilotlari va muassasalari rahbarlari, deputatlar, mas’ullar hamda ommaviy axborot vositalari vakillari ham ishtirok etgan.
Markaziy Bankning rasmiy saytidagi ochiq ma’lumotlarda esa Erkin Mansurov hozirda ham bosh boshqarma boshlig‘i sifatida ko‘rsatilmoqda. Bundan Mansurov hali ham shu lavozimda ishlayotganini anglash mumkin.
Ma’lumot uchun, 2023 yilning dekabr oyida Erkin Mansurovga nisbatan qamoqqa olish tarzidagi ehtiyot chorasi qo‘llanilgani va unga nisbatan o‘zlashtirish yoki rastrata yo‘li bilan talon-toroj qilish hamda mansab soxtakorligi moddalari bo‘yicha jinoyat ishi qo‘zg‘atilgani haqida xabarlar tarqalgandi. U 20 mln AQSH dollari miqdorida pullarni o‘zlashtirishda gumonlangan.