Bir kishi yo‘lda ketayotib, olov ichida qolgan ilonga ko‘zi tushibdi va uni alanga iskanjasidan qutqarishga qaror qilibdi. Shu on ilon dabdurustdan uni chaqib olibdi. Erkak chidab bo‘lmas og‘riq ta'siridan ilonni siltab tashlab yuboribdi. Jonivor to‘lg‘onganicha yana olov ichiga tushibdi. Shunda haligi kishi qo‘liga bir temirni olib, ilon tomon uzatibdi va uni baribir qutqaribdi. 

Bir chetda hayrat bilan kuzatib turganlardan biri undan so‘rabdi: «Bu ilon seni chaqib oldi, nega shunga qaramay unga yana yordam ko‘rsatding?» 

Xaloskor shunday javob qilibdi: «Chaqish bu – sudralib yuruvchilarga xos bo‘lgan jihat. Ularning mijozi shunday. Lekin ushbu holat mening yordam berishga bo‘lgan istagimni so‘ndirmasligi, ya'ni mening mijozimni o‘zgartirmasligi lozim».

Qissadan hissa: kimdir seni yaralagani yoki qalbingga ozor yetkazgani uchun o‘z borlig‘ingdan kechma. Yomonlik ta'sirida xatoga yo‘l qo‘yib, go‘zal qalbingni aslo zaharlama! Shunchaki dushman yoki raqiblarga qarshi ehtiyot chorasini ko‘rishni unutma va zinhor o‘zligingni yo‘qotma! 

Gulchehra AZIMOVA tayyorladi.