Poytaxtimizda Cogʻliqni saqlash vazirligi bilan hamkorlikda Oʻzbekiston reproduktiv tibbiyot assotsiatsiyasining “Reproduktiv texnologiyalar – yangi hayotga yoʻl” mavzusidagi I kongressi ish boshladi.

Anjumanda dunyoning 15 ta davlatidan qariyb 100 nafar olimlar, ekspertlar va investorlar ishtirok etmoqda.

Taʼkidlash lozimki, yurtimizda sogʻliqni saqlash tizimini tubdan isloh etish va uning rivojini yangi bosqichga koʻtarish, ayniqsa, onalik va bolalikni muhofaza qilishga alohida eʼtibor qaratilyapti.

Yurtimizda mazkur yoʻnalishda Respublika ixtisoslashtirilgan akusherlik va ginekologiya ilmiy-amaliy tibbiyot markazi bilan birga, 62 ta perinatal markaz, 14 ta skrining va reproduktiv salomatlik markazlari, shahar va tumanlarda 400 dan ziyod tugʻuruq va bolalar muassasalari xizmat koʻrsatmoqda.

Tadbirda soʻzga chiqqan Sogʻliqni saqlash vaziri Amrillo Inoyatov sogʻliqni saqlash sohasida xususiy sektor ulushi yildan yilga ortib borayotganini eʼtirof etdi.

— Ilgari reproduktiv tibbiyot yoʻnalishida davlat va xususiy sektor hamkorligi yaxshi yoʻlga qoʻyilmagan edi, — dedi vazir. — Vaholanki, bugun yurtimizda akusherlik va ginekologiya, pediatriya, reproduktologiya boʻyicha 1500 dan ziyod xususiy tibbiyot tashkilotlari faoliyat olib bormoqda.

Xususan, yordamchi reproduktiv texnologiyalar asosida xizmat koʻrsatuvchi 10 dan ziyod klinikalarning 6 tasi chet el investorlari ishtirokida tashkil qilingan.

Biz kelgusida ushbu muassasalar imkoniyatlaridan samarali foydalanish, sohaga investitsiyalarni yanada keng jalb qilish maqsadida 15 ta perinatal markaz va 3 ta respublika darajasidagi tugʻuruq muassasalarida davlat-xususiy sheriklik asosida “Yordamchi reproduktiv texnologiyalar markazlari”ni tashkil etmoqchimiz.

A.Inoyatov soʻzini davom ettirib, xalqaro vakillar va mahalliy mutaxassislarga oʻzaro hamkorlik boʻyicha qator takliflar bildirdi.

Jumladan, xususiy tugʻuruq komplekslarini barpo etishga chaqirib, u yerda koʻrsatilgan xizmatlarni davlat tomonidan sotib olinishiga kafolat berilishini taʼkidladi.

Kongressda klinik reproduktologiya, andrologiya, embronologiya va reproduktiv genetikaning asosiy masalalari plenar va seksiya yigʻilishlari, mahorat maktablari, trening va davra suhbatlarida onlayn va oflayn tarzda muhokama qilinmoqda.