Foto: «Халқ сўзи»

Fargʻona viloyatining anklav hududida joylashgan Shohimardon qishlogʻi yilning toʻrt faslida ham betakror va xushmanzara tabiati bilan sayyohlarni ohanrabodek oʻziga chorlaydi. Shu bois bu yerdagi tarixiy-meʼmoriy ziyoratgohlar, ekoturistik markazlar hamisha tashrif buyuruvchilar bilan gavjum boʻladi.

Ayni kunlarda esa Shohimardonda qish tarovati hukmron. Viqorli qoya-toshlar saltanati, oq libosga burkangan bepoyon archazorlar, zarif qoʻshiqlar kuylab oqadigan tiniq soylar, sharqona hovlilardagi maroqli suhbatlar har qanday qishida bir umrga unutilmas xotiralar qoldiradi.

— Shohimardon tabiati muzeyi, zamonaviy mezonlar asosida taʼmirdan chiqarilgan Hazrat Ali ziyoratgohi, Yordon qishlogʻi, Dugoba togʻlari boʻylab qamrab olingan ekoturistik marshrutlar roʻyxati yildan-yilga kengayib borayotir, — deydi Shohimardon muzeyi xodimi Gulnoza Najmiddinova. — Shohimardonga mahalliy va xorijiy sayyohlarni jalb etish borasidagi izchil saʼy-harakatlar tufayli bu yerga nafaqat yurtimiz boʻylab, balki qoʻshni respublikalardan ham sayyohlar oqimi tobora koʻpayib bormoqda.

Botir Madiyorov, “Xalq soʻzi”.