Shu kunlarda Istanbulda Rossiya va Ukraina delegatsiyalari oʻrtasida 2022-yildan buyon ilk marta toʻgʻridan-toʻgʻri muzokaralar oʻtkazilishi kutilmoqda.

Unda qatnashishdan bosh tortgan Rossiya tashqi ishlar vaziri Sergey Lavrov Ukraina prezidenti Vladimir Zelenskiyni tanqid qildi. U Zelenskiy muzokaralarda Rossiya prezidenti Vladimir Putinning shaxsan ishtirok etishini taʼkidlagani uchun 'ayanchli odam' ekanini aytdi.

Lavrov, shuningdek, Kiyevning Gʻarbdagi ittifoqchilariga qattiq norozilik bildirdi va ularni qoʻllab-quvvatlashni 'urushga daʼvat' deb atadi.

'Berlin ham, Parij ham, Bryussel ham, London ham Ukrainada tinchlik oʻrnatilishini istamaydi. Gʻarb poytaxtlari Rossiya bilan qarama-qarshilikka intilmoqda', ' dedi Rossiya TIV rahbari. Uning soʻzlariga koʻra, Gʻarb davlatlari 'Kiyevni jangovar harakatlarni davom ettirishga tayyorlash' uchungina oʻt ochishni toʻxtatishga intilmoqda.

Ana shu jarayonda AQSH prezidenti Donald Tramp Vladimir Putin bilan shaxsan uchrashmaguncha konstruktiv tinchlik muzokaralarini kutmasligini ochiq aytdi.

'Putin va men bir stolga oʻtirmagunimizcha hech narsa boʻlmaydi', dedi Tramp Dubayga ketayotganida jurnalistlarga.

Zelenskiy, oʻz navbatida, Anqarada oʻtkazilgan matbuot anjumanida muzokaralarda Ukraina delegatsiyasiga mamlakat mudofaa vaziri Ruslan Umerov boshchilik qilishini aytdi. Ukraina prezidenti Istanbulga delegatsiya yuborishini, biroq oʻzi muzokaralarga bormasligini bildirdi.

Putinning farmoniga muvofiq, Rossiya delegatsiyasiga prezident yordamchisi Vladimir Medinskiy rahbarlik qiladi. Shuningdek muzokaralar guruhiga Rossiya Qurolli kuchlari Bosh shtabi Bosh razvedka boshqarmasi boshligʻi Igor Kostyukov, tashqi ishlar vaziri oʻrinbosari Mixail Galuzin va mudofaa vaziri oʻrinbosari Aleksandr Fomin kirdi.

Oʻz navbatida, Zelenskiy Turkiyadagi matbuot anjumanida yana bir bor Rossiyaning yangi hududiy daʼvolarini tan olmasligini taʼkidladi. Shuningdek, u Qrimdan kechmasligini qoʻshimcha qilgan. Turkiya rahbari Rejep Tayyip Erdogʻan ham 15-may kuni Zelenskiy bilan uchrashuvda Qrim Ukrainaga tegishli ekanligini aytgan.

'Donald Trampning pozitsiyasi ikkala tomonga ham bosim oʻtkazishdir. Men Ukrainaga koʻproq bosim oʻtkazilganiga ishonaman', ' degan Zelenskiy. Frontdagi vaziyat haqida gapirganda, u Rossiya barcha yoʻnalishlarda doimiy hujumda ekanligini aytdi.

AQSH davlat kotibi Marko Rubioning taʼkidlashicha, AQSH Rossiya va Ukraina muzokaralariga katta umid bogʻlamaydi. U Rossiya ' Ukraina muzokaralarida faqat Donald Tramp va Vladimir Putinning bevosita ishtirokida sezilarli yutuqlarga erishish mumkin deb hisoblaydi. AQSH maʼmuriyati Istanbuldagi Rossiya va Ukraina delegatsiyalari oʻrtasidagi muzokaralar natijalariga eʼtibor qaratib, ikki prezidentning mumkin boʻlgan uchrashuvini belgilaydi.

Ommaviy axborot vositalari xabarlariga koʻra, Rossiya va Ukraina delegatsiyalari uchrashuvi, bugun 16-mayda Turkiya vaqti bilan soat 12:30 ga boshlanishi belgilangan. Undan oldin AQSH Davlat kotibi Marko Rubio Turkiya va Ukraina vakillari bilan uchrashadi.

Donald Tramp esa Yaqin Sharqdagi safarini bugun yakunlaydi. Undan soʻng qayerga uchishi nomaʼlum.