Foto: Xalq so‘zi

Mamlakatimizda elektr energiyasiga boʻlgan talabning ortishi manba taqchilligiga ham sabab boʻlmoqda. Bu esa uning muqobil turlaridan foydalanishni taqozo etadi. Shu nuqtayi nazardan hukumatimiz tomonidan yashil energiyani qoʻllashga qaratilgan chora-tadbirlar koʻlami kengaytirilmoqda. Binobarin, shu yilning 10-iyun kuni davlatimiz rahbari raisligida boʻlib oʻtgan videoselektor yigʻilishida energiya taʼminotida barqarorlikka erishishdagi eng samarali yoʻl yashil energiyadan foydalanish ekanligi taʼkidlandi.

— Yashil energiyadan foydalanish orqali nafaqat taʼminotda barqarorlikka, balki iqtisodiy samaradorlikka ham erishish mumkin, — deydi Andijon shahridagi “Chinor” mehmonxonasi bosh menejeri Axrorbek Mamajonov. — Masalan, 88 oʻrinli mehmonxonamiz toʻliq muqobil energiya hisobiga ishlaydi. Buning uchun binoning tom qismidagi 180 m/2-maydonga quyosh panellarini oʻrnatdik. Natijada bir yilda 300 ming kilovatt elektr energiyasi, 240 ming metr kub tabiiy gazni tejayapmiz.

Hisob-kitobga koʻra, quyosh panelini oʻrnatish bilan bogʻliq 210 million soʻmlik loyiha bir yarim yil ichida oʻzini oqlaydi va 30 yil davomida beminnat xizmat qiladi.

Saminjon HUSANOV, “Xalq soʻzi”.