Sanitariya-epidemiologik osoyishtalik va jamoat salomatligi qoʻmitasida “Aholini toza va sifatli ichimlik suvi bilan taʼminlanishi, shu jumladan tibbiyot muassasalarida suv taʼminotining sanitariya qoidalari, normalari va gigiyena normativlariga muvofiqligi” mavzusida davra suhbati oʻtkazildi.

Tadbirni Oliy Majlis Qonunchilik palatasining Fuqarolarning sogʻliqni saqlash masalalari qoʻmitasi raisi Yelena Borisova ochib berib, mamlakatimizda aholini, birinchi navbatda qishloq aholisini sifatli ichimlik suvi bilan taʼminlash borasida tizimli ishlar amalga oshirilayotganini taʼkidlab oʻtdi.

Ichimlik suvi taʼminotini tashkil qilishda va ichimlik suvi tarmoqlaridan foydalanish jarayonida sanitariya qoidalari, normalari va gigiyena normativlari talablariga rioya etilmasligi, aholining sanitariya-epidemiologik osoyishtaligini taʼminlashda muammolarga sabab boʻladi, yaʼni aholi oʻrtasida yuqumli ichak kasalliklar tarqalishiga, hattoki suv orqali tarqaladigan yuqumli ichak kasalliklar boʻyicha favqulodda holatlar yuzaga kelishi mumkin.

Suv manbalari va aholiga beriladigan suvni mikrobiologik va kimyoviy ifloslanishdan muhofaza qilishni taʼminlash borasida Sanitariya-epidemiologik osoyishtalik va jamoat salomatligi qoʻmitasi hamda uning hududiy boshqarma va boʻlimlari doimiy nazorat olib borish yoʻlga qoʻyilgan.

Sanitariya-epidemiologik osoyishtalik va jamoat salomatligi qoʻmitasining 112 ta sanitariya-gigiyena laboratoriyalarida suvni sanitariya-kimyoviy koʻrsatkichlar boʻyicha 201 ta bakteriologiya laboratoriyalarida, 15 ta virusologiya laboratoriyalarida va 17 ta oʻta xavfli yuqumli kasalliklar laboratoriyalarida esa mikrobiologik koʻrsatkichlar boʻyicha ichimlik suvi laboratoriya tahlilidan oʻtkazib boriladi.

Respublikamizda aholi ichimlik suv bilan taʼminlovchi 960 ta kommunal va 4483 ta qishloq hamda idoraviy suv inshootlari roʻyxatga olingan. Ulardan 239 tasi yirik aholi punktlarini ichimlik suvi taʼminlovchi hisoblanadi va ochiq suv havzalaridagi suvlarni tozalash natijasida aholi ichimlik suv bilan taʼminlaydi, qolgan suv inshootlarida yer osti manbalaridan ichimlik suvini oladi.

Respublika boʻyicha 10526 ta davolash-profilaktika muassasalari (DPM) faoliyat yuritib, shulardan, Sogʻliqni saqlash vazirligi tasarrufidagi 360 tasi statsionar, 1196 ta oilaviy-shifokorlik punkti (OSHP), 1064 ta oilaviy poliklinika (OP), 209 tasi koʻp tarmoqli markaziy poliklinika (KTMP) va boshqa tibbiyot muassasalar faoliyat yuritib kelmoqda. Statsionar DPMlardan 30 tasi yuqumli kasalliklar shifoxonasi, 27 tasi perinatal markazlar va tugʻruqxonalar, 10 tasi pediatriya va bolalar shifoxonalari, 12 tasi ftiziatriya shifoxonalari, 15 tasi ruhiy va narkologik shifoxonalar, 7 tasi qishloq uchastka shifoxonalari (QUSH) va boshqa statsionar muassasalardir.

Faoliyat yuritayotgan 10562 ta DPMlarning 5964 tasi (56,7%) markazlashtirilgan ichimlik suv tarmogʻiga ulangan, 3510 tasi (33,3%) mahalliy, yaʼni oʻz hududidan chiqarilgan suv taʼminoti, yaqin hududlardagi ichimlik suv manbaidan tashib kelinadigan suv bilan taʼminlangan. Mahalliy inshootlardan ichimlik suvi taʼminlanayotgan muassasalarning aksariyatining binolari ichiga ichimlik suvi tarmogʻi kiritilmagan, tibbiyot xodimlari foydalanish uchun tashib olib kirishadi.

Davra suhbati davomida  Oliy Majlisi Qonunchilik palatasining Fuqarolarning sogʻliqni saqlash masalalari qoʻmitasining raisi oʻrinbosari Maqsuda Vorisovaning “Aholini salomatligini saqlashda suvni ahamiyati hamda suv bilan taʼminlashdagi huquqiy asoslar haqida”, SanEPID qoʻmitasi raisi oʻrinbosari Nurmat Atabekovning “Aholini toza va sifatli ichimlik suvi bilan taʼminlanishi, shu jumladan tibbiyot muassasalarida suv taʼminotining sanitariya qoidalari, normalari va gigiyena normativlariga muvofiqligi” yuzasidan maʼruzalari tinglandi.

Tadbirda taʼkidlanganidek, respublika aholisini toza va sifatli ichimlik suv bilan taʼminlash hamda oqova suv xizmatlarini yaxshilash borasida olib borilayotgan ishlarni yanada jadallashtirish, ichimlik suv taʼminoti va oqova suv xizmatlari qamrovini oshirish orqali ularning munosib turmush sharoitlarini yaratish hamda sogʻligʻini saqlashga xizmat qiladi.

Ochiq muloqot tarzida oʻtgan tadbirda yigʻilganlar oʻzlarini qiziqtirgan savollarga javoblar olishdi.