Prezidentimiz tashabbusi bilan joriy yil yurtimiz boʻylab tugʻma yurak nuqsonidan aziyat chekayotgan 2 ming nafar bemor bolada bepul yuqori texnologik operatsiyalar oʻtkazilmoqda.

Buning uchun davlatimiz tomonidan 64 milliard soʻmdan ziyod mablagʻ yoʻnaltirilib, ijtimoiy himoyaga muhtoj oilalarning 18 yoshgacha boʻlgan farzandlarida navbatsiz, imtiyozli yoʻllanmasiz, eng malakali shifokorlar tomonidan jarrohlik amaliyotlari bajarilyapti.

Mazkur ezgu tashabbusning davomi sifatida Sogʻliqni saqlash vazirligi tomonidan mamlakatimizda ilk bor “Dispanser nazoratida turgan hamda nogironligi boʻlgan bolalar salomatligi oyligi” boshlandi.

Shu yil 7-iyundan 7-iyulga qadar boʻlib oʻtadigan mazkur aksiya davomida surunkali va ogʻir xastaliklarga chalinib, tibbiy yordamga muhtoj boʻlgan bemor oʻgʻil-qizlar chuqurlashtirilgan tibbiy koʻriklardan oʻtkaziladi.

— Dastlab Qoraqalpogʻiston Respublikasi, Toshkent shahar va viloyatlardagi oilaviy poliklinikalar va oilaviy shifokor punktlarining patronaj va amaliyot hamshiralari tomonidan oʻz uchastkasidagi dispanser nazoratida turgan hamda nogironligi boʻlgan bolalar bazasi shakllantiriladi, — deydi Sogʻliqni saqlash vaziri oʻrinbosari Elmira Basitxanova. — Shundan soʻng maxsus tibbiy brigadalar tomonidan chuqurlashtirilgan tekshiruvlar oʻtkaziladi.

Xususan:

— koʻp tarmoqli markaziy poliklinikalar mutaxassislari jalb qilingan holda oilaviy poliklinika va oilaviy shifokor punktlarida tibbiy koʻriklar tashkil etiladi;

— xonadonlarda tibbiy-diagnostika muolajalari amalga oshiriladi;

— zarurat boʻlganda KTMPda tekshiruvlar oʻtkaziladi.

Shuningdek, tibbiy koʻriklarga Respublika ixtisoslashtirilgan pediatriya ilmiy-amaliy tibbiyot markazi, Bolalar milliy tibbiyot markazi hamda hududiy koʻp tarmoqli bolalar tibbiyot markazlarining eng malakali mutaxassislari jalb etiladi.

Tekshiruvlarda aniqlangan kasalliklar boʻyicha har bir bola salomatligini tiklash va mustahkamlash choralari koʻrilib, ular uchun alohida sogʻlomlashtirish rejasi tuziladi.

Unga koʻra:

— bemor bolalarning bir guruhi uy sharoitida;

— birlamchi boʻgʻindagi kunduzgi shifoxonalarda ambulator holatda;

— statsionar yordamga muhtoj bemorlar tuman, shahar hamda viloyat miqyosidagi tibbiyot muassasalarida davolanadi.

Bundan tashqari, yuqori texnologik tibbiy yordamga ehtiyoji bor bolalarga viloyat va respublika muassasalariga imtiyozli yoʻllanmalar taqdim etiladi.