Davlatimiz rahbari topshirigʻiga asosan tuzilgan Respublika ishchi guruhining navbatdagi ommaviy qabuli Xorazm viloyatining Xonqa tumani “Durgadik” mahallasida tashkil etildi.

Ochiq muloqotlarda Prezident Administratsiyasi, Oliy sud, Bosh prokuratura, Ichki ishlar vazirligi va Soliq qoʻmitasi, viloyat hokimligi rahbar va masʼullari Qoraqalpogʻiston va Xorazm aholisi muammolarini tingladi.

Jumladan, 149 ta murojaat boʻyicha arizalar Oliy sud tomonidan kassatsiya va takroran kassatsiya tartibida mazmunan koʻrib chiqish uchun qabul qilinib, tegishli sudlov hayʼatlariga koʻrib chiqish uchun oʻtkazildi. 37 nafar mahkum axloq tuzatish ishlari jazosidan muddatidan ilgari shartli ravishda ozod qilindi, 2 ta jinoyat ishi boʻyicha 2 nafar shaxs sud zalidan qamoqdan ozod etildi, 4 ta jinoyat ishi taraflar yarashganligi sababli tugatildi.

Undan tashqari, tadbirkorlik subyektlari daʼvo arizalari asosida ular foydasiga 1.2 mlrd. soʻmlik qarzdorlik undirilishi belgilandi.

Ichki ishlar vazirligi rahbariyati bilan muloqotlar natijasida surishtiruv yo dastlabki tergov harakatlaridan norozi 63 nafar murojaatchining masalasi hal qilib berilgani yoki 12 nafar sobiq xodimning yana tizimga ishga tiklangani – jamiyatimizda adolat ovozi tobora balandroq jaranglayotganiga yorqin hayotiy misoldir.

Xivalik Odilbek Xudoyberganov esa oilaviy korxonasi uchun olgan 2 milliard 179 million soʻm kreditni toʻlayotgan boʻlsa-da, bank va taʼminotchi xorijdan qoʻlqop ishlab chiqarish uskunalarini toʻliq yetkazib bermaganidan shikoyat qilyapti. Murojaatdan soʻng mazkur masala Bosh prokuratura nazoratiga olindi.

Qoraqalpogʻistonlik Shaydo Nuraliyeva avvalgi murojaatlari asosida kuni kecha turmush oʻrtogʻi Husniddin Nuraliyevga oqlov hukmi chiqarilgani uchun Oliy sud masʼullariga minnatdorlik bildirdi.

Soliq qoʻmitasi masʼullariga murojaatidan soʻng urganchlik tadbirkor Oybek Bekchanovga notoʻgʻri hisoblangan 1 mlrd. soʻmdan ziyod qoʻshilgan qiymat soligʻi qaytariladigan boʻldi.

Bundan tashqari qabullar natijasida 63 nafar ijtimoiy himoyaga muhtoj talabalarga kontrakt toʻlovlari toʻlab berilishi belgilandi, 40 nafar ijtimoiy himoyaga muhtoj xotin-qizlarga tikuv mashinalari, zarur asbob-uskuna va boshqa jihozlar berildi.

Ommaviy qabulda koʻrib chiqilgan 1164 ta masalaning 331tasi joyida hal qilinib, 262 nafar murojaatchiga huquqiy maslahat va tushuntirish berilgan boʻlsa, 571 ta murojaat nazoratga olindi.