Moskvada vafot etgan oʻzbekistonlik migrant yuzasidan Tashqi mehnat migratsiyasi agentligi munosabat bildirdi

Ijtimoiy tarmoqlarda Moskva shahrida oʻzbekistonlik mehnat migrantining politsiya tomonidan hujjatlarini tekshirish vaqtida vafot etgani haqida tarqalgan xabarlar yuzasidan quyidagilarni maʼlum qilamiz.

Tashqi mehnat migratsiyasi agentligining Moskva shahridagi vakolatxonasi tomonidan ushbu holat oʻrganilishi natijasida maʼlum boʻlishicha, fuqaro O.O. sogʻligʻi yomonlashgani sababli Botkina nomidagi shahar shifoxonasiga joylashtirilgan.

Shifoxona xodimlari tomonidan koʻrsatilgan tibbiy yordamlarga qaramasdan, u vafot etgan. Politsiya xodimlari tomonidan hujjatlarini tekshirish natijasida uning vafot etgani haqidagi maʼlumot tasdiqlanmagan.

Joriy yilning 25-may kuni ushbu vafot etgan fuqaroning jasadi Oʻzbekistonga qaytarilgan.