Toshkent shahridagi Xalqaro Vestminster universitetida Markaziy Osiyo huquqiy forum oʻtkazildi

Foto: TXVU Axborot xizmati

Toshkent shahridagi Xalqaro Vestminster universitetida “Oʻzgarishlar davrida huquqiy asoslar: Markaziy Osiyo, Yevropa, Buyuk Britaniya va dunyo hamjamiyati hamkorligi” mavzusida Markaziy Osiyo huquqiy forumi oʻtkazildi.

Forum Markaziy Osiyo mamlakatlarining Yevropa va dunyo hamjamiyati bilan savdo aloqalarining huquqiy sohadagi rivoji va istiqbollarining tahliliga bagʻishlandi.

Uning doirasida Markaziy Osiyo davlatlarining xalqaro savdo borasidagi amaldagi qonunchiligi tahlili va Oʻzbekistonning bu boradagi strategiyasi koʻrib chiqildi. Ushbu tadbirning asosiy maqsadlaridan xalqaro savdo huquqi borasidagi yangi yoʻnalishlarni aniqlab, bu boradagi muammolar yechimi borasidagi yagona yondashuvni ishlab chiqish boʻldi. Anjuman doirasida tadqiqotchilar, huquqshunoslar va ushbu sohaga aloqador boʻlgan chet ellik mutaxassislar xalqaro savdo huquqi sohasida mavjud boʻlgan boshqarish modellari hamda uning Oʻzbekiston, Yevropa, Buyuk Britaniya va dunyo miqyosida qoʻllanish amaliyotini muhokama qilishdi. Forumda “Iqtisodiy sanksiyalar: Xalqaro arbitrajdagi yangi muammolar”, “Investitsiyalarni himoya qilish tizimi va barqaror rivojlanish”, “Oʻzbekistonda qonun ustuvorligi: qogʻozda va amalda” mavzularida maʼruzalar taqdim etildi.

Anjumanda “Taraqqiyot strategiyasi” markazining ijrochi direktori Eldor Tulyakov, Toshkent davlat yuridik universiteti rektori vazifasini bajaruvchi Islombek Rustambekov va bir necha boshqa davlat muassasalari vakillari ishtirok etdi.

Forumning asosiy spikerlari sifatida Angliyaning Liverpul universitetining Xalqaro iqtisodiy huquq boʻyicha professori Mavluda Sattorova, shuningdek, global miqyosda 77 ta mamlakatda faoliyat yurituvchi va tasarrufidagi huquqshunoslar soni boʻyicha dunyoning eng yirik xalqaro huquqshunoslik kompaniyasi — “Denton” vakila Diyora Ziyayeva va bir qator boshqa xalqaro ekspertlar qatnashdi.