Pandemiya sababli xorijlik diplomatlarning katta qismi, shu jumladan, xalqaro gumanitar tashkilotlar xodimlari Shimoliy Koreyani tark etdi. Mamlakatda mahsulotlar va dori-darmon vositalarining keskin tanqisligi kuzatilmoqda. Bu haqda Pxenyandagi Rossiya elchixonasiga tayanib “Interfaks” xabar berdi.

“Bugun 18-mart kuni Pxenyandan chiqib ketgan 38 nafar chet el fuqarosining Xitoy bilan chegaradosh Dandun shahrida joylashgan mehmonxonadagi ikki haftalik karantin muddati yakunlandi. Endi ular Pekin yoki Shanxayga qarab yo‘l oladi, u yerdan esa o‘z mamlakatlariga uchib ketadi”, — deyiladi elchixonaning Facebook’da e’lon qilingan xabarida.

Diplomatik vakolatxonaning ta’kidlashicha, “endi KXDRni jamoaviy tark etgan diplomatik vakolatxona xodimlarining hisobini aytish qiyin”.

“Bir narsa aniq, bu oxirgisi emas, xorijliklar mamlakatni tark etishda davom etadi. Hozir bu yerda ular deyarli qolmadi, mamlakatdan chiqib ketmaganlar bor-yo‘g‘i 290 kishidan kamroqni tashkil qiladi. Shimoliy Koreya poytaxtini tark etayotganlarni tushunish mumkin, har kim ham kuch bilan o‘rnatilgan keng ko‘lamli umumiy cheklovlarga, zarur mahsulotlar va dori-darmon vositalarining keskin tanqisligiga, sog‘lig‘i bilan bog‘liq muammolarni hal qilish erkinligining yetishmasligiga dosh berolmaydi”, — deyiladi xabarda.

Rossiya elchixonasining ma’lumotlariga ko‘ra, Buyuk Britaniya, Venesuela, Braziliya, Germaniya, Italiya, Nigeriya, Pokiston, Polsha, Chexiya, Shvetsiya, Shveysariya, Fransiya vakolatxonalarining “eshiklariga qulf osilgan”, xalqaro gumanitar tashkilotlarning barcha xodimlari mamlakatni tark etgan.

“Hozir bu yerda faqat 9 nafar elchi va to‘rt nafar vaqtinchalik ishonchli vakil o‘z mamlakatlari nomidan ish yuritmoqda, lekin shu vaqtgacha faoliyat ko‘rsatayotgan elchixonalar xodimlari minimal darajagacha qisqartirildi”, — deyiladi xabarda.

Elchixonaning qo‘shimcha qilishicha, Rossiyaning diplomatik vakolatxonasi o‘z ishini davom ettirmoqda. “Albatta, bizga ham oson emas, muammo juda ko‘p, bir nechta oila turli sabablarga ko‘ra xizmat safarlarini tugatishga majbur bo‘ldi. Lekin jamoaning ishga layoqatliligi to‘lig‘icha saqlanib turibdi, biz o‘zimizga yuklatilgan barcha vazifalarni bajaryapmiz va bajarishda davom etamiz”, — deb ta’kidladi diplomatik vakolatxona.

Avvalroq Rossiya va Koreya Xalq Demokratik Respublikasi (KXDR) o‘rtasidagi chegaralar bir yildan ortiq vaqtdan buyon yopiq bo‘lgani sababli Rossiya elchixonasi xodimlari va ularning oila a’zolari o‘z vataniga dezina (temiryo‘lda yuradigan motorli yoki motorsiz arava, vagon)da qaytib kelgani haqida xabar berildi.

Shuningdek, Shimoliy Koreya hukumati Vashington Pxenyanga nisbatan dushmanlik siyosatidan voz kechmaguncha AQShning yangi ma’muriyati bilan aloqa o‘rnatmasligini aytdi. Bu haqda KXDR tashqi ishlar vazirining birinchi o‘rinbosari Chve Son Xining Koreya Markaziy telegraf agentligi tomonidan e’lon qilingan bayonotida ma’lum qilindi.

Shu o‘rinda, AQSh prezidenti Jo Bayden KXDR rahbari Kim Chen In bilan uchrashuv o‘tkazishni rejalashtirayotgani yo‘q. Bu haqda Oq uy vakili Jen Psaki xabar berdi.

Bundan tashqari, mamlakat Malayziya bilan diplomatik aloqalarni uzayotganini ma’lum qildi. Bunga sabab qilib Malayziyaning o‘z hududidagi Shimoliy Koreya fuqarosini AQShga topshirmoqchiligi ko‘rsatilmoqda.