Tatariston rahbari Rustam Minnixanov 17-may kuni rasmiy tashrif bilan Turkmanistonga keldi, deb yozmoqda “Xronika Turkmenistana”.

Dastlab prezident Gurbanguli Berdimuhamedov bilan ikki tomonlama, keyinroq esa kengaytirilgan tartibda muzokaralar bo‘lib o‘tdi. Turkmaniston rahbari aprel oyi oxirida Qozonga Yevrosiyo iqtisodiy ittifoqining sammitida ishtirok etish uchun borgan o‘g‘li boshchiligidagi delegatsiyani iliq kutib olgani uchun hamkasbiga minnatdorchilik bildirdi.

Muzokaralardan keyin Tatariston muftiysi Malikguli Berdimuhamedov xotirasiga, Turkmaniston muftiysi esa Qozon fojiasida halok bo‘lganlar xotirasiga duo qildi.

Ma’lumot uchun, avvalroq Paraxat-7 tumanidagi Ashxobod masjidining atrofidagi hudud zudlik bilan tartibga keltirildi. U yerga prezidentlarning tashrif buyurishi kutilayotgan edi, lekin muftiylar prezident saroyida ibodat qiladigan bo‘ldi.

Keyin davlat rahbarlari MI-17-1B vertolyotini ko‘zdan kechirdi.

Tashrif yakunida Gurbanguli Berdimuhamedov Rustam Minnixanovga Akdo‘st laqabli alabay zotidagi kuchuk bolasini sovg‘a qildi. Kuchukni Minnixanovga “Turkman alabaylari” xalqaro assotsiatsiyasining rahbari Serdar Berdimuhamedov topshirdi. Tatariston yetakchisi hamkasbiga “original sovg‘a” uchun minnatdorchilik bildirdi.

Avvalroq Turkmaniston parlamenti “Xizmat ko‘rsatgan itboqar” va “Xalq itboqari” faxriy unvonlarini ta’sis etish to‘g‘risidagi qonun loyihalarini qabul qilgani haqida xabar berilgandi. 21-aprel kuni Gurbanguli Berdimuhamedov o‘z o‘g‘lini “Turkmanistonda xizmat ko‘rsatgan itboqar” unvoni bilan taqdirladi.

Bundan tashqari, Berdimuhamedov Turkmaniston poytaxtining yubileyi kuni tug‘ilgan birinchi chaqaloqqa Ashxobod deb ism qo‘yishni buyurgan edi. Shuningdek, u teatrlarda “xalqning baxtli hayoti” to‘g‘risidagi spektakllar yo‘qligi sabab madaniyat vaziriga hayfsan bergan.

SHuningdek, Turkmanistonda Vazirlar Mahkamasining 7-may kuni bo‘lib o‘tgan yig‘ilishida prezident Gurbanguli Berdimuhamedov bosh vazir o‘rinbosarlariga “Mening oppoq shahrim — Ashxobod” nomli yangi kitobi ustidagi ishlarni yakunlaganini aytdi. Xabarga ko‘ra, Turkmaniston poytaxtining 140 yilligiga bag‘ishlangan mazkur kitobda shahar tarixi, geografiyasi, shuningdek, Ginnesning rekordlar kitobiga kiritilgan ko‘plab inshootlar tasvirlangan.