Rossiya Federatsiyasida biri 20 yil ikkinchisi 10 yil mobaynida qidiruvda boʻlgan transport vositalari Qibray va Toshkent tumanlarida saqlab kelinayotganligi maʼlum boʻldi. Ish tergovga oʻtkazildi.

Toshkent viloyati IIBB Yoʻl harakati xavfsizligi boshqarmasiga Qibray tumanida yashovchi fuqaro Gʻ.S. ariza bilan murojaat qilgan. U murojaatida oʻziga tegishli “Vaz-2106” transport vositasini uzoq yillar uyida saqlab kelganligi, ilgari fuqaroligi boʻlmaganligini sababli fuqaroligi yoʻq shaxslarga beriladigan davlat raqam belgisini olganligini maʼlum qilgan. Hozirda esa Oʻzbekiston Respublikasi fuqarosi boʻlganini uchun tegishli tartibda transport vositasining qayd etish guvohnomasini almashtirib, boshqa davlat raqam belgisi berishni soʻragan.

Ushbu transport vositasiga tegishli maʼlumotlarni va transport vositasini agregat raqamlarini Oʻzbekiston Respublikasi IIVning “Yagona avtomatlashtirilgan hisob tizimi”dan tekshirganida avtomobil 2000-yilning 12-mart kunida Rossiya Federatsiyasining Orenburg shahridan olib qochilganligi hamda qidiruvda ekanligi aniqlangan.

Shuningdek, Toshkent tumanida yashovchi fuqaro I.A. sotib olgan “GAZ-330202” rusumli yuk transport vositasini rasmiylashtirish uchun DYHXXga olib kelgan. Ushbu avtomobilning ham agregat raqamlari tekshirilgan. Natijada transport vositasi 2011-yilda beri qidiruvda ekanligi, uni nomaʼlum shaxslar Rossiya Federatsiyadan olib qochganliklari maʼlum boʻlgan.

Hozirgi kunda har ikkala holat boʻyicha toʻplangan hujjatlar tegishli xulosa qilish uchun tergov organiga topshirilgan.