TOShKENT, 25 yanv — Sputnik. Evroosiyo iqtisodiy ittifoqi (EOII) hukumatlararo kengashining navbatdagi yig'ilishi 2021 yil 5 fevralda Olmaotada bo'lib o'tadi, deb xabar qildi Sputnik Qozog'iston mamlakat tashqi ishlar vazirligiga asosan.

Sputnik

EOII-O'zbekiston hamkorlik "Yo'l xaritasi" tasdiqlandi

Yig'ilishda Armaniston, Belarus, Qozog'iston, Qirg'iziston, Rossiya hukumat rahbarlari va Evroosiyo iqtisodiy komissiyasi Hayʻati raisi ishtirok etadi.

Bundan tashqari, tadbirda EOIIda kuzatuvchi-davlatlar - Moldova, O'zbekiston va Kuba ishtirok etishi kutilmoqda.

Yig'ilishlar tor va kengaytirilgan tarkibda bo'lib o'tadi. Savdo-iqtisodiy hamkorlikni kengaytirish, ichki bozor faoliyatidagi to'siqlarni bartaraf etish, shuningdek iqtisodiyotning ayrim tarmoqlarida integratsion salohiyatni rivojlantirish masalalari muhokama qilinadi.

Eslatib o'tamiz, bugun Oliy Majlis Qonunchilik palatasining O'zbekistonning EOII bilan hamkorligini yo'lga qo'yish masalasini o'rganishni tashkil etish bo'yicha ishchi guruhining yig'ilishi bo'lib o'tdi.

Dastlab yig'ilishda O'zbekiston Respublikasi prezidenti Shavkat Mirziyoyev tomonidan 2020 yil 29 dekabr kuni Oliy Majlisga yo'llangan Murojaatnomadan kelib chiqib, 2021 yilda EOII bilan hamkorlikni yo'lga qo'yish masalasini o'rganishni tashkil etish, O'zbekistonning EOIIga kuzatuvchi maqomida ushbu miintaqaviy tuzilmaning keng imkoniyatlaridan har tomonlama foydalanish yo'llarini qidirish Qonunchilik palatasida tuzilgan mazkur ishchi guruhning asosiy vazifalaridan biri ekanligi taʻkidlandi.

Yig'ilish ishtirokchilari O'zbekiston EOIIda kuzatuvchi maqomini olganligi hamda ushbu tashkilotga aʻzo bo'lgan davlatlar bozorlarida to'laqonli ishtirok etishi uchun hamkorlikning huquqiy tartibga solish mexanizmlarini chuqur o'rganish, milliy texnik tartibga solish meʻyorlarini EOII talablariga moslashtirish bo'yicha ishlarni jadallashtirish zarurligini taʻkidlashdi. EOII bilan O'zbekiston o'rtasida hamkorlik ishlarini samarali tashkil etish maqsadida 2021 yilga mo'ljallangan "Yo'l xaritasi" loyihasi atroflicha muhokama qilinib, tasdiqlandi.