Bugun, 20-mart kuni tongda Isroil Gʻazoning shimoliy hamda janubiy hududlariga zarbalar bergan. Mazkur hujum oqibatida 71 nafar falastinlik, jumladan, ayollar va bolalar halok boʻldi, deb xabar qilmoqda 'Al Jazeera' nashri.

Maʼlumotlarga koʻra, Isroil hukumati tomonidan berilgan soʻnggi zarbalar oqibatida vafot etgan falastinliklar soni 436 nafarga yetgan. Shulardan 183 nafari yosh bolalar ekanligi taʼkidlanmoqda.

18-mart, seshanba oqshomida Isroil bosh vaziri Binyamin Netanyaxu Gʻazo sektoriga qilingan hujumlarni 'bu hali boshlanishi' deya izohlagan edi.

'HAMAS guruhi soʻnggi 24 soat davomida bizning nimalarga qodirligimizni koʻrdi. Men sizlarga ishontirib aytamanki, bu hali boshlanishi. Biz oldimizga qoʻygan maqsadimizga yetmaguncha ortga qaytmaymiz, kurashni davom ettiramiz', ' degan Netanyaxu.

Shuningdek, Netanyaxu barcha garovda ushlab turilgan Isroil fuqarolarini ozod etish, HAMAS harakatini yoʻq qilishi orqali esa Gʻazoning Isroilga tahdid qilmasligini kafolatlashi haqida qoʻshimcha qilgan.

Vashingtondagi Amerika taraqqiyot markazi siyosiy tahlilchisi HA Heller Isroilning Gʻazoga qilayotgan ushbu hujumlari natija bermasligini aytib oʻtdi.

'Oʻn olti oylik urush davomida koʻrdikki, Isroil oʻz maqsadiga yeta olmadi. Gʻazoga hujumlarning qayta boshlanishi ham HAMASni magʻlub qila olmaydi', ' deydi Heller.

Maʼlumot uchun, hozirga qadar Isroilning Gʻazoga qarshi urushi natijasida 49 ming 547 nafar falastinliklar halok boʻlgan. 112 ming 719 nafari esa turli darajadagi tan jarohatlari olgan. Shuningdek, yana minglab falastinliklar vayronalar ostida bedarak yoʻqolgani taxmin qilinmoqda.