AQSH prezidenti Donald Tramp oʻzining sobiq doʻsti va ittifoqchisi, milliarder Ilon Maskni birinchi marta oshkora tanqid qildi. U tadbirkordan hafsalasi pir boʻlganini aytdi va Maskning 'Tesla' va 'SpaceX' kompaniyalariga davlat subsidiyalarini toʻlashni toʻxtatishni taklif qildi. Bunga javoban Mask uning yordamisiz respublikachi hech qachon prezidentlik saylovlarida gʻalaba qozona olmasligini aytdi va Trampni voyaga yetmaganlarni zoʻrlashga aloqadorlikda aybladi. Sobiq doʻstlar oʻrtasidagi janjalga nima sabab boʻldi? Bu nimaga olib kelishi mumkin? Quyida shular xususida.

Janjal nimadan kelib chiqdi?

Tramp va Mask oʻrtasidagi kelishmovchilik shu hafta milliarder Oq uy tomonidan qoʻllab-quvvatlangan soliq va xarajatlar toʻgʻrisidagi qonun loyihasini tanqid qilganidan keyin yuzaga keldi. Bu janjal tezda ijtimoiy tarmoqlardagi shaxsiy hujumlarga aylanib, AQSH siyosiy va ishbilarmon doiralarida shov-shuvga sabab boʻldi.

5-iyun oqshomida Germaniya kansleri Fridrix Mers bilan uchrashuvda AQSH prezidenti Donald Tramp jurnalistning savoliga javob berar ekan, oʻzining sobiq ittifoqchisi Ilon Mask bilan ziddiyatda ekanini ilk bor tan oldi.

Yaqin vaqtgacha Mask AQSH hukumat samaradorligi departamentini boshqargan, ammo 29-may kuni u isteʼfoga chiqqan edi. Koʻp oʻtmay, tadbirkor oʻzining sobiq boshligʻining siyosiy qarorlarini ehtiyotkorlik bilan tanqid qila boshladi. Unga importga qoʻyilgan tariflar, Tramp tomonidan maʼqullangan soliqni kamaytirish, shuningdek, prezidentning qarz chegarasini bekor qilish niyati yoqmadi.

'Menga har doim Ilon yoqardi va bu har doim juda hayratlanarli. Men uni [soliq imtiyozlari toʻgʻrisida] qonun loyihasidan koʻra meni tanqid qilganini afzal koʻraman... Ilon va men juda yaxshi munosabatda edik. Kelajakda shunday boʻlishiga ishonchim komil emas', ''dedi Donald Tramp.

Bu bayonot Tramp va Mask oʻrtasidagi munosabatlarda uzoq vaqtdan beri shaxsiy mojaro kelib chiqqani haqidagi mish-mishlarni tasdiqladi. Tadbirkor prezidentning eng yaqin ittifoqchilari ' Davlat kotibi Marko Rubio va savdo maslahatchisi Piter Navarro haqida bir necha bor qattiq gapirgan edi.

Trampning nutqidan soʻng Mask birinchi marta prezidentning oʻziga ochiqchasiga hujum qildi.

'Mensiz Tramp saylovda yutqazgan boʻlardi, demokratlar Vakillar palatasini nazorat qilgan boʻlardi, respublikachilar esa Senatda 51 dan 49 tagacha oʻringa ega boʻlardi', ' dedi Ilon Mask.

Mask jiddiy 'hujum'ga oʻtdi

Trampning bayonotidan bir necha soat oʻtgach, tadbirkor unga nisbatan shaxsiy noshukurlikdan tortib marhum milliarder Jeffri Epshteyn bilan bogʻliq bolalarga nisbatan jinsiy zoʻravonlik ishiga aloqadorlikkacha bir qator ayblovlarni qoʻydi.

'Haqiqiy bomba tashlash vaqti keldi: Prezident Donald Tramp Epshteyn ishi bilan shugʻullanadi. Bu fayllar ommaga oshkor etilmasligining haqiqiy sababi. Xayrli kun, Donald Tramp!', ' dedi Ilon Mask.

Bundan tashqari, u AQSH Kongressini prezidentga qarshi impichment jarayonini boshlashga chaqirdi, hokimiyatni vitse-prezident Jey Di Vensga topshirishni taklif qildi va NASA tomonidan foydalaniladigan 'Dragon' kosmik kemasidan foydalanishni toʻxtatishga vaʼda berdi.

Biroq, 6-iyun, juma kuni ertalab u soʻnggi bayonotini qaytarib oldi. 'Yaxshi, biz 'Dragon'ni ishdan chiqarmaymiz', dedi u.

Nega Tramp milliarderni tanqid qildi?

Biznesmenning ayblovlariga javoban Tramp Amerika Qoʻshma Shtatlari Maskning 'Tesla' va 'SpaceX' kompaniyalarini moliyalashtirishni toʻxtatishini aytdi va bu byudjetni 'milliardlab dollarlarni' tejashini taʼkidladi.

'Men har doim Bayden nima uchun bunday qilmaganiga hayron boʻlardim!' ' dedi Oq uy rahbari.

Shuningdek, u Maskning 'charchaganini' taʼkidladi va uni bir necha oy oldin ishdan boʻshatish niyatida ekanligini tan oldi ' uning soʻzlariga koʻra, bu milliarderning 'aqldan ozgan xatti-harakati'ga sabab boʻlgan.

'Ilonning menga qarshi oʻgirilishi meni qiziqtirmaydi, lekin u buni bir necha oy oldin qilishi kerak edi. Bu Kongressga kiritilgan eng katta [soliq imtiyozlari] qonun loyihalaridan biridir', ' deydi Tramp.

AQSHliklar mojaro haqida qanday fikrda?

Sobiq ittifoqchilarni yarashtirishga chaqiriqni birinchi boʻlib oʻzining radikal bayonotlari bilan tanilgan reper Kane Uest bildirdi.

'Birodarlar, bunday emas. Biz ikkalangizni juda yaxshi koʻramiz', ' dedi u.

Biroq mojaro haqida radikalroq gapirganlar ham bor edi. AQSH prezidentining sobiq maslahatchisi Stiven Bannon Maskni Janubiy Afrikadagi vataniga deportatsiya qilishga chaqirdi.

'Ular uning immigratsiya maqomi boʻyicha rasmiy tergov boshlashlari kerak, chunki men uning noqonuniy musofir ekanligiga va zudlik bilan deportatsiya qilinishiga qatʼiy ishonaman', ' deydi Stiv Bannon.

Ayni paytda, YouGov soʻroviga koʻra, amerikaliklarning aksariyati (52 foiz) hech birining tarafida emasligini koʻrsatdi. Ovoz berganlarning 28 foizi Trampni, sakkiz foizi Maskni qoʻllab-quvvatlagan. 11 foizi esa oʻz pozitsiyasini bildirmagan.

Janjal nimaga olib kelishi mumkin?

Mojaro allaqachon jiddiy moliyaviy yoʻqotishlarga olib keldi: 5-iyun, payshanba kuni NASDAQ fond birjasidagi 'Tesla' aksiyalari 14,26 foizga tushib ketdi va buning natijasida Mask 34 milliard dollar yoʻqotdi. Trampning yoʻqotishlari ancha kamtar edi ' taxminan 1,1 milliard dollar.

Amerikalik siyosiy strateg va tahlilchi, 'Campaign Insider' Telegram kanali muallifi Pavel Dubravskiy ziddiyat prezidentga jiddiy zarar yetkazishi dargumon ekanligini taʼkidladi. Uning soʻzlariga koʻra, Tramp endi uchinchi muddatga oʻz nomzodini qoʻya olmaydi va uning saylovdagi reytingi xavf ostida emas.

'Bu ikki amaldor oʻrtasidagi ziddiyat emas, balki milliarder va amaldagi prezident oʻrtasidagi mojaro. Respublikachilar Trampni albatta qoʻllab-quvvatlaydi, chunki u davlat rahbari' ' deydi Pavel Dubravskiy.

Shuningdek, u Maskning pedofiliyadagi ayblovlari asossiz koʻrinishini qoʻshimcha qildi. Ekspertning soʻzlariga koʻra, Federal qidiruv byurosi Jo Bayden prezidentligi davrida, jumladan, Epshteyn ishi boʻyicha Trampdan kir topishga uringan, biroq natijaga erishmagan.

Tramp jiddiy oqibatlar bilan tahdid qildi

Donald Tramp sobiq ittifoqchisi Ilon Maskni demokratlarga xayriya qilishni boshlasa, 'juda jiddiy oqibatlarga olib kelishi' bilan tahdid qildi.

'Agar shunday qilsa, u juda jiddiy oqibatlarga duch keladi', ' dedi Oq uy rahbari 'Agar Mask soliq va xarajatlarga qarshi boʻlgan demokratlarni qoʻllab-quvvatlay boshlasa, nima boʻladi?', degan savolga.

Tramp, shuningdek, Mask bilan doʻstona munosabatlarni tiklash istagi yoʻqligini taʼkidladi.

'Men boshqa ishlar bilan bandman... U bilan gaplashish niyatim yoʻq', ' dedi Tramp.