Madridning 'Real' klubi bosh murabbiyi Karlo Anchelotti joriy mavsum yakunida jamoani tark etadi. Bu haqda futbol olamidagi ishonchli manbalardan biri ' jurnalist Fabrisio Romano oʻzining X sahifasida xabar bergan.

Manbaga koʻra, italiyalik mutaxassis 11-may, yakshanba kuni boʻlib oʻtadigan 'Barselona'ga qarshi La Liga 35-tur uchrashuvidan soʻng 'qaymoqranglilar' bilan rasman xayrlashadi. 'El-Klasiko'dan keyin Anchelottining ketishi haqida rasmiy bayonot berilishi kutilmoqda.

Maʼlumotlarga koʻra, Karlo Anchelottiga Braziliya terma jamoasi tomonidan jiddiy qiziqish bildirilgan. Janubiy Amerikaning eng kuchli terma jamoalaridan biri 2026-yilgi Jahon chempionati oldidan yangi bosh murabbiy izlayapti va tajribali murabbiy Anchelotti bu roʻyxatning yuqori qismida turibdi. Shuningdek, Saudiya Arabistonining boy va ambitsiyali klubi 'Al-Hilol' ham 64 yoshli mutaxassis xizmatlariga eʼtibor qaratmoqda.

'Real' rahbariyati esa allaqachon Anchelottining oʻrnini egallashi mumkin boʻlgan nomzodlarni koʻrib chiqmoqda. Ayni paytda ularning diqqat markazida Leverkuzenning muvaffaqiyatli bosh murabbiyi Xabi Alonso turibdi. 9-may kuni Alonso rasmiy bayonot orqali mavsum oxirida 'Bayer'ni tark etishini eʼlon qilgan. Bu holat uning 'Real'ga qaytish ehtimolini yanada kuchaytirmoqda.

Karlo Anchelotti 'Real' bilan koʻplab yutuqlarga erishdi va klub tarixida unutilmas iz qoldirdi. Uning ketishi yangi davr boshlanishining belgisi boʻlishi mumkin.