Jahongir BOYMURODOV/'Xalq soʻzi'. Qashqadaryo viloyati hokimligida oʻtkazilgan yigʻilishda hududdagi bolalar oromgohlarini 2025-yil yozgi mavsumiga tayyorlash, ularda bolalarning xavfsiz va mazmunli dam olishi uchun zarur shart-sharoitlar yaratish masalalari muhokama qilindi.

' Joriy yilda Kitob, Shahrisabz, Yakkabogʻ tumanlari hamda Shahrisabz shahridagi tabiat manzarali hududlarda joylashgan 17 ta statsionar bolalar oromgohida 7 yoshdan 14 yoshgacha boʻlgan 23 ming nafardan ortiq bolani dam oldirish va sogʻlomlashtirish rejalashtirilgan, ' dedi viloyat hokimi Murotjon Azimov. ' Bolalarning yozgi taʼtilni mazmunli va xavfsiz oʻtkazishi uchun barcha yoʻnalishlardagi ishlar oʻz vaqtida, tizimli va sifatli tashkil etilishi lozim.



Yigʻilishda oromgohlarda xavfsizlik talablariga rioya etilishi, sanitariya-gigiyena holati, infratuzilma va obodonchilik ishlari alohida eʼtiborda boʻlishi qayd etildi. Bolalar uchun qulay va xavfsiz sport maydonlari, sanitariya uzellari, yotoq joylari taʼmirdan chiqarilishi, mavjud kamchiliklar monitoring qilinib, oʻz vaqtida bartaraf etilishi zarurligi taʼkidlandi.

Masʼul rahbarlarga har bir oromgoh boʻyicha aniq chora-tadbirlarni belgilash, bolalarning mazmunli va xotirjam taʼtil olishini taʼminlash boʻyicha tegishli topshiriqlar berildi.