Jahongir BOYMURODOV/'Xalq soʻzi'. Qashqadaryo viloyatining barcha shahar-u qishloqlarida Navroʻz bayrami 'Qadriyatlarining boqiy boʻlsin, Navroʻz!' degan bosh gʻoya asosida, umumxalq sayllari sifatida keng nishonlanmoqda. Viloyatning asosiy bayram tantanalari Qarshi shahridagi Alisher Navoiy nomli istirohat bogʻida tashkil etildi.

Taʼkidlash joiz, Navroʻz bayramining zamirida xalqimizning ulkan tarixi, milliy qadriyatlari, urf-odatlari, marosimlari, udum va anʼanalari mujassam. Qariyb 30 gektarlik bogʻda tashkil etilgan bayram saylida ham bu jihatlar oʻz aksini topdi.



Unda viloyatning barcha shahar va tumanlari, mahallalar, milliy madaniy markazlar, folklor-etnografik dastalari, hunarmandlar, kasb-hunar, ijod maktablari, sport muassasalari oʻzlarining milliy udum va anʼanalari, milliy liboslari, taomlari, yoshlarning ijod va sportda qoʻlga kiritayotgan yutuqlari koʻrgazmasini tashkil etishdi.

Shu bilan bir qatorda, sayilgohda tashkil etilgan milliy oʻyinlar, folklor sanʼatining noyob namunalari, keksayu yosh qalbidan chuqur joy olgan qadimiy urf-odatlar, ezgu insoniy tuygʻular tarannum etilgan kuy-qoʻshiqlar, oʻlan, lapar va dostonlar ijrosi barchaga yanada oʻzgacha xushnudlik bagʻishladi.



Bayramning rasmiy qismi istirohat bogʻi hududidagi amfiteatrda boʻlib oʻtdi. Uni viloyat hokimi Murotjon Azimov tabrik soʻzi bilan ochib berdi.

Viloyat hokimi qashqadaryoliklar bu yilgi Navroʻz shodiyonalariga oʻziga xos tayyorgarlik bilan kelishganini alohida qayd etib, barcha soha va tarmoqlar kesimida sifat koʻrsatkichi taʼminlanayotganini aniq misollar, fakt va raqamlar asosida koʻrsatib berdi.

' Jumladan, viloyatda yuqori iqtisodiy oʻsishni taʼminlash, tadbirkorlikni faol qoʻllab-quvvatlash hisobiga bu yil olti yuz mingta yangi ish oʻrni yaratiladi, ' deydi Murotjon Azimov. ' 'Kambagʻallikdan farovonlik sari' dasturi asosida yuz ming nafar aholi kambagʻallikdan chiqariladi. Shuningdek, viloyatda sakkiz ming xonadonli koʻp qavatli uylar qurilishi rejalashtirilgan. Ichimlik suvi bilan taʼminlash darajasi 65 foizga yetkaziladi. Viloyat koʻp tarmoqli tibbiyot markazi, Qarshi tumani tibbiyot birlashmasi qaytadan qurilib, eng ilgʻor uskunalar bilan jihozlanadi. Dehqonobod tibbiyot birlashmasi mukammal taʼmirlanadi.



Viloyat hokimi shuningdek, taʼlim, turizm, qishloq xoʻjaligi sohalarida amalga oshirilayotgan ishlar, kutilayotgan natijalar haqida toʻxtalib, bularning barchasi Prezidentimiz tomonidan aholining farovon turmush tarzini taʼminlash boʻyicha olib borilayotgan siyosatning yana bir namunasi ekanligini taʼkidlab oʻtdi.

Sanʼatkorlar ijrosidagi dilbar navolar, jozibali raqslar, badiiy sahna chiqishlari barchaga xush kayfiyat, shodonlik ulashdi.