Sharof Rashidov tumanining Bobur Mirzo nomli mahalla fuqarolar yig‘inida istiqomat qiluvchi Sh.A. pul uchun har qanday qabihlikdan toymaydiganlar toifasidan. Jumladan, ora-sira Turkiya va Rossiyaga «tirikchilik» vaji bilan chiqib turadigan ushbu shaxs Moskvada bir muddat ijtimoiy tarmoq orqali narkotik va psixotrop moddalar savdosi hamda ushbu vositalarni «mijoz»larga yetkazish bilan shug‘ullandi.

Bu ham yetmaganidek, u odamfurushlik ortidan pul topmoq tashvishiga tushib qoldi. Chunonchi, o‘zining doimiy yashash manziliga qaytgach, fohishalik bilan shug‘ullanish uchun odam yollay boshladi. Bu haqida xabar topgan viloyat IIB TQX JQB UJQKB odam savdosiga qarshi kurashish bo‘linmasi xodimlari fuqaroni kuzatuvga olishdi.

Mazkur jarayonda u Jizzax shahrining «Kimyogar» mahallasida vaqtinchalik ro‘yxatda turib, yashovchi S.J. hamda G‘allaorol tumanining «Baxt» mahallasida istiqomat qiluvchi S.P.ni oyiga 2–3 ming AQSH dollaridan pul topishlariga ishontirib, Rossiya Federatsiyasida fohishalik qilishga ko‘ndirganligi aniqlandi. 

Natijada gumon qilinuvchi ikki nafar ayolni aeroportga olib ketayotganida qo‘lga olindi. Shundan so‘ng Sh.A.ning uyali aloqa vositasi ko‘zdan kechirilganida jinsiy qullik uchun olib ketilayotganlarning fotosuratlari topildi. Tergovga qadar surishtiruv davomida gumon qilinuvchi qizlarning suratlarini ijtimoiy tarmoqqa joylamoq niyatida olganligini bildirdi.

Joriy yilning o‘tgan davrida bo‘linma ayni mazmundagi uchta jinoyatni fosh etdi. Bundan tashqari, mahalla fuqarolar yig‘inlari, o‘quv muassasalari, shuningdek, temiryo‘l bekatlarida odam savdosiga qarshi 50 dan ortiq targ‘ibot tadbirlari o‘tkazildi. Mazkur jarayonda fuqarolar xorijiy davlatlar qonunchiligi, yuzaga kelish mumkin bo‘lgan xatarlar hamda ko‘mak olish mumkin bo‘lgan tashkilotlarga oid tarqatmalar bilan ta’minlanyapti.  

Shuningdek, ommaviy axborot vositalari hamda ijtimoiy tarmoqlarda profilaktik chiqishlar qilinmoqda. Qolaversa, chet elda uzoq muddat bo‘lgan shaxslar bilan muloqotlar o‘tkazilmoqda. 

Sodiq QO‘CHQOROV,

mayor.

Jizzax viloyati.