Toshkent davlat iqtisodiyot universiteti talabasi B.A. inson aʼzolari oldi-sotdisida ayblanib, jinoiy jazoga tortildi. Bu haqda 'Xalq soʻzi'ga Toshkent shahar sudlari matbuot kotibi Zokir Qoʻziboyevning maʼlum qildi.

Bildirilishicha, 2003-yilda tugʻilgan B.A. ijtimoiy tarmoqlarga inson aʼzolarini sotib olishi haqida eʼlon joylashtirgan. U mazkur eʼlonlarida buyrakni 38 ming, jigarni 43 ming hamda suyak iligini 23 ming dollarga olishini bildirgan.

Ushbu eʼlondan soʻng fuqaro J.R. u bilan muloqotga kirishgan. B.A. unga bitta buyragini 38 ming dollarga sotib olishini aytgan.

'Sheriklarim Germaniyada. Buyrakni koʻchirib oʻtkazish oʻsha yerda amalga oshiriladi. Buning uchun Germaniyaga borishingiz kerak. Safar uchun oldindan 350 dollar berishingiz kerak', degan talaba fuqaroga.

B.A. joriy yilning 26-aprel kuni Shayxontohur tumani hududida J.R.dan kelishilgan pulni olgan vaqtida huquqni muhoqaza qiluvchi idoralar xodimlari tomonidan oʻtkazilgan tezkor tadbirda ushlangan.

Sud hukmi bilan B.A. Jinoyat kodeksining 25- (jinoyatga tayyorgarlik koʻrish va jinoyat sodir etishga suiqasd qilish), 133-1-moddasi 1-qismida (inson aʼzolarining va (yoki) toʻqimalarining oldi-sotdisi) nazarda tutilgan jinoyatni sodir qilishda aybli deb topilgan. Unga 3-yil ozodlikni cheklash jazosi tayinlangan.