Livan Sogʻliqni saqlash vazirligi payshanba kuni Isroilning Eron tomonidan qoʻllab-quvvatlanadigan 'Hizbulloh' guruhiga qarshi yirik hujumini amalga oshirayotgan va janubdagi Livan tinch aholisini uylariga qaytmaslik haqida ogohlantirayotgan bir paytda Isroilning hujumi Livan janubida besh nafar favqulodda xizmat xodimini oʻldirgan.

Livan muvaqqat bosh vaziri Najib Mikatining aytishicha, AQSH va Fransiya oʻrtasida oʻt ochishni toʻxtatish kelishuvini tiklash maqsadida aloqalar olib borilmoqda. Bu Isroil oʻtgan oy rad etgan sulhga erishish uchun diplomatik saʼy-harakatlarga ishoradir. Lekin bu toʻgʻrisida Vashington yoki Parijdan hech qanday izoh berilmagan.

Oʻtgan oy AQSH, Fransiya va boshqa davlatlar Isroil hamda 'Hizbulloh' oʻrtasida 21 kunlik sulh tuzishga chaqirgan edi.

Isroilning bildirishicha, Livan hujumi bir yil avval Gʻazoda HAMASni qoʻllab-quvvatlash uchun oʻt ochgan 'Hizbulloh' tomonidan uchirilgan transchegaraviy raketalar tufayli Isroil shimolidan evakuatsiya qilingan oʻn minglab isroilliklarning uylariga qaytishini taʼminlashdan iborat.

Livan sogʻliqni saqlash vazirligining maʼlum qilishicha, Isroil tunda bergan zarbasi chegaradan 10 km uzoqlikda joylashgan qishloq fuqarolik mudofaasi markaziga zarba bergan va besh nafar tez tibbiy yordam va qutqaruvchilar halok boʻlgan. Isroil harbiylari hozircha holatga hech qanday izoh bermagan.

Isroil payshanba kuni Livan janubidagi quruqlikdagi amaliyotlar chogʻida 12 askarining halok boʻlgani haqida xabar berdi.

Shuningdek, Isroil Eronning 1-oktyabr kungi raketalariga javob qaytarishga tayyorlanayotganini aytib kelmoqda. Baʼzi tahlilchilar fikricha, Isroil Eron harbiy obyektlarini, ayniqsa hujumda qoʻllanilgan ballistik raketalarni ishlab chiqaradigan binolarini nishonga olishi mumkin. Shuningdek, u Eronning havo hujumidan mudofaa tizimlari va raketalarni uchirish moslamalarini yoʻq qilishga intilishi mumkin.