Yolg‘on gapirmang. Farzandingizni aslo aldamang, yolg‘on va'dalar bermang, qaror va fikrlaringizni o‘zgartirmang. Agar bolaning biron iltimosini bajarishni unutgan bo‘lsangiz, shunchaki undan uzr so‘rang. Har bir kichik yolg‘on – bolaning oldida obro‘-e'tiboringizni tobora tushirishga xizmat qiladi.

Asabiylashmang. Bolalar bizning tabiatimiz va kayfiyatimizni juda yaxshi his etib, o‘zlariga tez qabul qilishadi. Odatda, vazmin kishilarning o‘g‘il-qizlari ham og‘ir-bosiq bo‘lib voyaga yetadi. Ikkinchidan, bola tarbiyasi anchayin sabr-toqatni talab etadi. 

Farzandingizni urmang. Bolaga qo‘l ko‘tarib (hatto bu kichik shappati bo‘lsa ham), unga barcha masalalarni kuch orqali hal qilish mumkinligini o‘rgatgan hisoblanasiz. 

Yomon o‘rnak ko‘rsatmang. Ichish va chekishni odat qilgan, nosog‘lom turmush tarzini olib borayotgan ota-onalar o‘sib kelayotgan avlodning ruhiyatiga salbiy ta'sir ko‘rsatadi. Bundan tashqari, o‘zi sigaretani tutatib, farzandiga chekishning zarari haqida gapirgan odamning so‘zlari hech qanday ta'sirga ega bo‘lmaydi. 

Erkalatib yuborishdan qo‘rqmang. Har bir ota-ona o‘z farzandini bag‘riga bosishi, ko‘tarib, erkalashi, unga sovg‘alar tuhfa etishi kerak. Bu, bir tarafdan, bola tarbiyasidagi o‘ziga xos va kerakli jihat. Asosiysi, har narsaning me'yori bo‘lishini unutmaslik va yuqoridagi qoidalarga amal qilishdir. 

Unutmang, har bir farzandning bolalik davri yagona va u ortga qaytmaydi. Ularning bag‘ringizda o‘tkazgan har bir oni baxtiyor va samarali kechishi esa faqatgina sizga bog‘liq.

Gulchehra AZIMOVA tayyorladi.