O‘z navbatida, blogerlarning jamiyatning ong-u tafakkuriga, qarashlariga ta’siri ortib borayotir. Xususan, qaysidir olimning biror mintaqa yoki hududda kechayotgan siyosiy va iqtisodiy jarayonlarning aniq tahlil qilib berishi ommaning o‘sha voqeaga nisbatan to‘g‘ri munosabatini shakllantirishga omil bo‘lyapti. 

Qolaversa, internet insonning so‘z erkinligiga doir huquqlarini samarali ta’minlashda qo‘l kelayotir. Ammo mazkur erkinlikdan ayrimlarning asossiz shov-shuv ko‘tarish yoki noqonuniy pul topish maqsadida foydalanishayotgani ko‘ngilni xira qiladi. Shu o‘rinda bir hamkasbimdan eshitganim mavzuga oid holatni bayon etsam. 

«Tumanimizda bir bloger tashkilot va korxonalar boshliqlarining aybini ochish bilan shug‘ullanadi. Kimdir rahbarining nohaqligidan shikoyat qilib kelsa, bloger o‘sha odam orqali rahbar to‘g‘risida negativ material to‘plab, uni ijtimoiy tarmoqda sharmanda qilish bilan qo‘rqitadi va murojaatchining muammosini hal qiladi. So‘ng rahbarni qisishda davom etib, o‘zi uchun katta pul undiradi».

Ana shu tafsilotdan so‘ng o‘sha «bloger»ning «Youtube»dagi bir nechta materiallarini ko‘rdim. Muallif izohidagi imlo xatolariga qaraganda, savodi haminqadarligi, o‘zini tutishidan esa o‘ta surbetligi sezilib turardi. Ochig‘i, qaysidir ma’noda bizga hamkasb bo‘lgan blogerdan ranjiganim holda, unga «boj» to‘layotgan mas’ullarga rahmim kelmadi. Vaqti kelib, ular qilgan qonunbuzarliklari uchun qonuniy jazolarini ham olishiga ishonaman.  

Xullas, bugun ko‘plab blogerlar el dardi bilan yonib yashayotir, tayyorlagan materiallari bilan xalqning hurmatini qozonib, obunachilar va ko‘rishlar soniga ko‘ra yaxshigina pul topishmoqda. O‘z navbatida, jig‘ildonini harom luqma bilan to‘ldirishdan or qilmayotgan blogerlar esa sharmanda bo‘lib, qachondir qilmishiga yarasha jazosini oladi. Zero, bu ko‘hna dunyo to‘g‘ri yaxshilik, egri yomonlik topqusini ko‘p bora isbotlagan.  

 Alijon ABDUSATTOROV,

o‘z muxbirimiz.

Jizzax viloyati.