Uchtepa tumani IIofmb PPX inspektori, safdor Jahongir Tog‘ayev Qashqadaryo viloyati Shahrisabz tumanida tug‘ilgan. Hozirgi kunda Profi universitetining 4-kurs talabasi. 

Yoshligidan adabiyotga havas qo‘ygan, bo‘sh vaqtlarida ko‘plab kitoblar mutolaa qilgan qahramonimiz maktab davrlaridayoq she’r yozishni mashq qila boshlagan. Havaskor yosh ijodkorning ijodiy ishlari respublika nashrlarida ham chop etilgan. 

U o‘zining ilk she’riy to‘plamini taqdim etish arafasida.  

G‘ayrat-shijoatga to‘la safdor J. Tog‘ayev ko‘nglidagi orzularni amalga oshirishga shoshiladi. Xayolida turli rejalar, g‘oyalar hami­sha qaynab toshadi. Shuning uchun hammasiga ulguradi. Tilagimiz, uni yoshlik zavqi hech qachon tark etmasin.

O‘z muxbirimiz.

Toshkent shahri.

OTANG BO‘LSA...

Ota-quyosh, uni to‘smas bulut ham,

Parvozingda ortda qolar burgut ham,

Qadding egmas, ezg‘ilamas seni g‘am,

Shukr deyman, yonginamda otam bor.

Otang bo‘lsa, tulporing ham samandir,

Otang bo‘lsa, sahrolar ham chamandir,

Boshingga tosh kelsa ham u omondir,

Boshim omon, yonginamda otam bor.

Suyanganim misoli tog‘ otamdir,

Muhabbatda, mehrda u Hotamdir,

Qirolimning malikasi onamdir,

Shahzodaman, yonginamda otam bor.

Har onimda to‘q turadi ko‘nglim ham,

Yaqinlashmas, yiroq yurar mendan g‘am,

Badavlatman, davlatmanddan nimam kam,

Boshim ko‘kda, yonginamda otam bor.

Jahongir TOG‘AYEV,

safdor.