Leytenant M.Ahmedov xizmat faoliyati davomida ana shunday hushyorlik namunalarini namoyon etib kelmoqda. 

Qorako‘l tumani Chandirobod qishlog‘ida tavallud topgan Mavlud­jon muddatli harbiy xizmatni o‘tagach, Buxoro davlat universitetiga o‘qishga kirdi. Oliy malumotli mutaxassis Buxoro shahridagi 35-sonli umumta’lim maktabida avval o‘qituvchi, so‘ng Ma’naviy-ma’rifiy ishlar bo‘yicha direktor o‘rinbosari lavozimlarida ishladi. To‘ng‘ich akasi Ma’rifjon 7532-harbiy qism xodimi bo‘lgani va harbiylikka ishtiyoqi sabab 2021-yilning dekabr oyida o‘tkazilgan tanlovda ishtirok etib, hozirgi vazifasida xizmatga qabul qilindi.

M. Ahmedovga tajribali profilaktika katta inspektori, kapitan 

A. Rahimov murabbiy etib biriktirildi.

Unga biriktirilgan «Guliston» mahallasi «qizil» toifada bo‘lib, ustozidan erinmay sohaning sir-asrorlarini, jinoyatga moyilroq va profilaktika hisobida turuvchi shaxslar bilan profilaktik suhbatlar olib borishni o‘rgandi. Birinchi yildanoq mahallani «qizil» toifadan «yashil» toifaga aylantirdi. Joriy yilning shu davrigacha esa jinoyat sodir etilishiga yo‘l qo‘yilmadi. 

Lavhamiz qahramoni xizmat ko‘rsatayotgan mahalla tuman markazida joylashgan. Mahalla faollari bilan hamjihatlig-u hamkorligi hamda katta-yu kichikni birday hurmat-u e’zozlab kelayotganidan, leytenant 

M. Ahmedov tuman va viloyat miqyosida o‘tkaziladigan tadbirlarda hamda musobaqalarda faol ishtirok etmoqda. Jumladan, 2022-yil viloyat ichki ishlar organlari xodimlari o‘rtasida bo‘lib o‘tgan kurash musobaqasida 70 kg vaznda faxrli birinchi o‘rinni egalladi. Yana shu yili «Eng yaxshi kitobxon» tanlovining respublika bosqichida IIVning faxriy yorlig‘i hamda esdalik sovg‘asi bilan taqdirlanganini alohida aytib o‘tish joiz. 

Bir so‘z bilan aytganda, leytenant Mavlud Ahmedov el-yurt tinchligi va osoyishtaligini ta’minlash yo‘lida fidoyilik ko‘rsatib xizmat qilmoqda. Uning xizmatidan esa aholi doimo minnatdor bo‘lib kelyapti. 

Mirzoqul AHADOV,

o‘z muxbirimiz.

Buxoro viloyati.