Dastlabki qiymati 60 million dollardan ziyod boʻlishi kutilayotgan loyihada Oʻzbekiston va Qirgʻiziston chegarasida har ikki tomonda ikkitadan yirik koʻmir saqlash ombori tashkil etiladi. Bu omborlar uzunligi 1,5 km lentali konveyer tizimi bilan bogʻlanadi. Natijada, har yili viloyatga qardosh mamlakatdan 6 million tonna sifatli va arzon qirgʻiz koʻmiri yetkazib beriladi.

' Oʻtgan yilgi mavsumda aholi, ijtimoiy sohalar hamda tadbirkorlik subyektlari ehtiyoji uchun 11 million tonna koʻmir olib kelingandi, ' dedi Fargʻona viloyati hokimi Xayrullo Bozorov. ' Bu loyihada koʻzda tutilayotgan quvvat nafaqat viloyat, balki mamlakatimizning boshqa hududlari talabini qondirish uchun qoʻshimcha sharoit yaratadi.

Aytish joiz, oʻtgan yili mazkur kompaniya 'Kirgizkomur' davlat korxonasi bilan kelishuvga koʻra, mamlakatdagi ikkita kondan koʻmir qazib olish huquqini qoʻlga kiritgan.

Uchrashuvda loyihani amalga oshirish boʻyicha texnik talablardan kelib chiqib, chegara va bojxona xizmati hamda ekologiya sohasi mutasaddilari bilan oʻzaro hamkorlikda ishlash muhimligi taʼkidlandi.