2019-yilda Yangiyerda Toshkent kimyo-texnologiya institutining filiali tashkil etilishi toʻgʻrisidagi xabar koʻplab mahalliy yoshlarni quvontirgandi. Filialda taʼlim va sanoat ishlab chiqarish birgalikda tashkil qilindi. Ayniqsa, ushbu manzilda 'Yoshlar sanoat texnoparki' barpo etilgani bu borada katta samara berdi.

Dastlab, texnoparkka 1 mln AQSH dollari miqdorida investitsiya jalb etildi. Investitsiya loyihasi doirasida konserva, konditer, yogʻ, omixta yem, non va non mahsulotlarini ishlab chiqarish hamda meva va sabzavotlarni quritish sexlari tashkil etildi. Natijada, talabalar oʻquv jarayonida olgan nazariy bilimlarini amaliyotda qoʻllash imkoniga ega boʻldi.

Yaqinda filialda yana bir salmoqli qadam ' Xitoyning jahondagi yetakchi 'Tianjin Xianjin Power supply Technology' kompaniyasi bilan hamkorlikda 'Energetika texnoparki' tashkil etildi. Loyihaga 5 mln AQSH dollari miqdorida xorijiy investitsiya jalb etildi. Texnoparkka yetakchi davlatlardan eng ilgʻor uskunalar olib kelib oʻrnatildi. U Oʻzbekiston hamda MDH davlatlarida innovatsion energiya manbalariga ortib borayotgan talabni qondirishga qaratilgan. Bu yerda yiliga 12 mlrd 500 mln. soʻmlik litiy ionli batareya(Li-ion)lar ishlab chiqarilib, eksport qilinadi. Portativ quvvatlovchi qurilmalar, elektrovelosiped, skuter, samokat va portativ elektr asboblari uchun akkumulyatorlar hamda energiya saqlash qurilmalari ishlab chiqariladi.

' Toshkent kimyo-texnologiya instituti Yangiyer filialida tashkil etilgan mazkur texnoparklar uchta yirik vazifani bajarish imkonini bermoqda, ' deydi filial direktori, texnika fanlari doktori Zafar Xakimov. ' Bir yarim mingga yaqin talabalarga fanlardan olgan nazariy bilimlarini amaliyotga tatbiq etish, ishlab chiqarish sharoitida amaliy tajribalar orttirishga koʻmaklashmoqda.

Darhaqiqat, oziq-ovqat, texnologik jarayonlarni avtomatlashtirish, elektr energiyasi, qurilish materiallari kabi yoʻnalishlarda tahsil olayotgan talabalarning amaliy mashgʻulotlari uzoq hududda emas, aynan, filialning oʻzida olib borilmoqda. Joriy yilda texnoparkda yigirmadan ortiq ixtisoslik fanlari boʻyicha ikki yuzdan ortiq amaliy mashgʻulotlarni oʻtkazish rejalashtirilgan. Talaba-yoshlar ishlab chiqarish jarayonlarida dastlabki kurslardan ishtirok etish orqali tadbirkorlik va biznes koʻnikmalariga ega boʻlmoqda. Bu ularga oʻz startap loyihalarini ishlab chiqish va amaliyotga joriy qilish uchun zamin yaratadi.

Texnoparklarning ikkinchi qulay jihati filial talabalari shu yerning oʻzida ish bilan taʼminlanayotganidir. Xususan, energetika texnoparkiga filialning 'Elektr energetikasi', 'Texnologik jarayonlar va ishlab chiqarishni avtomatlashtirish va boshqarish', 'Texnologik mashinalar va jihozlar' kabi taʼlim yoʻnalishlarining talabalari ishga qabul qilindi. Hozircha talabalar oyiga 300 AQSH dollari miqdorida maosh olishmoqda.

Kelgusida 170 nafar yoshni ana shunday doimiy ish bilan taʼminlash rejalashtirilgan. Bu esa ehtiyojmand talabalarning 30 foizini ijtimoiy himoya qilish va moddiy ahvolini barqarorlashtirish imkonini beradi. Uchinchidan, texnopark tashkil etish orqali filialda taʼlim va sanoat ishlab chiqarish jarayonini oʻzaro bogʻlashga muvaffaq boʻlindi. Bu esa ilmiy-tadqiqotlar koʻlamini ishlab chiqarish jarayoniga yoʻnaltirish, yangi innovatsion texnologiyalar tatbiqi hamda loyihalar ishlab chiqish uchun qulay shart-sharoit yaratdi. Texnoparklar negizida 15 ta magistrlik dissertatsiyasi, 8 ta doktorlik ilmiy-tadqiqot ishi olib borilayotgani fikrimizga dalil boʻla oladi.

Yangiyerdagi zamonaviy oliy taʼlim muassasasida mana shunday texnoparklarning ochilishi mintaqada innovatsion ishlab chiqarish va energetika texnologiyalarini rivojlantirish uchun yangi istiqbollarni ochadi hamda viloyatning iqtisodiy oʻsishi va rivojlanishiga munosib hissa qoʻshishiga shubha yoʻq.