Bugun IIV Madaniyat saroyida vazirlik markaziy apparati xodimlari ishtirokida “Tarix – vatanparvarlik, milliy g‘urur va iftixor manbai” mavzusida navbatdagi ma’naviyat va ma’rifat darsi o‘tkazildi.

Unda ishtirok etgan tarixchi Ixtiyor Esonov har bir xalq o‘z oldiga qo‘ygan ulkan maqsadlarni amalga oshirishda, avvalo, milliy o‘zligini anglashi, kindik qoni to‘kilgan ona yurtning qadimiy va boy o‘tmishini o‘rganishi hamda ulkan kuch-qudrat manbai bo‘lmish milliy g‘oyani rivojlantirmog‘i muhim ahamiyat kasb etishini ta’kidladi.

Shuningdek, notiq millat jonajon tarixi, milliy madaniyati va qadim qadriyatlaridan kuch olib, o‘zini o‘zi yangilashi, ertangi kunga tayyorlashi haqida fikr yuritarkan, milliy g‘ururi kuchli xalqni ma’naviy jihatdan aslo yengib bo‘lmasligini urg‘uladi.

Qiziqarli va mazmunli o‘tgan tadbir yakunida osoyishtalik posbonlari tomonidan berilgan savollarga atroflicha javob qaytarilib, ularning bu boradagi bilimlari yanada mustahkamlandi.

O‘z muxbirimiz.