AQSH Kongressining Vakillar palatasi Respublikachilar partiyasi tomonidan Xalqaro jinoiy sudga (XJS) qarshi sanksiyalar qo‘llash bo‘yicha ishlab chiqilgan qonun loyihasini ma’qulladi. Bu haqda CNN xabar berdi.

Qonun loyihasini 247 deputat qo‘llab-quvvatladi va 155 nafari qarshi ovoz berdi. Hech bir respublikachi qonun loyihasiga qarshi chiqmadi. Qonun loyihasi Senatda muvaffaqiyatsiz bo‘lishi kutilmoqda. Biroq bu qonunning qabul qilinishi Isroil Mudofaa vazirligi G‘azo sektoridagi qirg‘in xalqaro tanqid qilinishi fonida Kongressda Isroilni qo‘llab-quvvatlash davom etayotganini aks ettiradi.

"Xalqaro jinoiy sudga qarshi sanksiyalar qo‘llash to‘g‘risidagi qaror uning asossiz da’volariga zaruriy javobdir. Bugungi ovoz berishda XJS mansabdor shaxslarining qonunga zid xatti-harakatlari chegarasi aniqlandi. Qo‘shma Shtatlar Isroil bilan qat’iy turadi va xalqaro byurokratlarning Isroil rahbarlarini sodir etmagan jinoyatlari uchun asossiz hibsga olishga order berishiga yo‘l qo‘ymaydi" deydi Vakillar palatasi spikeri Mayk Jonson.

Sanksiya XJS mansabdor shaxslarining Qo‘shma Shtatlarga kirishini taqiqlaydi, har qanday AQSH vizalarini bekor qiladi va ularning Qo‘shma Shtatlarda mulkiy operatsiyalarni amalga oshirish imkoniyatlarini cheklaydi.

Isroilning G‘azo sektoridagi harbiy kampaniyasi davomida 36 mingdan ortiq odam halok bo‘ldi. Mahalliy sog‘liqni saqlash idoralariga ko‘ra, vayronalar ostida yana minglab jasadlar ko‘milgan.

Eslatib o‘tamiz, o‘tgan oyda Xalqaro jinoiy sud prokurori Karim Xon Sudgacha bo‘lgan palatadan Isroil Bosh vaziri Binyamin Netanyaxu va mamlakat Mudofaa vaziri Yoav Galantni hibsga olishga order berishni so‘ragan edi.

Toir Obidov