Rossiya Davlat Dumasi spikeri o‘rinbosari Pyotr Tolstoy Qozog‘iston shaharlari asli ruslarniki ekani, shuning uchun Rossiya Federatsiyasi ularga tarixiy huquqlarga egaligini da’vo qildi. Bu haqda u “Komsomolskaya pravda” radiosiga bergan intervyusida so‘z ochdi.

Tolstoy ko‘plab davlatlar Rossiya “Ukraina mavzusini yopayotganini” kuzatayotganini aytdi. Uning ta’kidlashicha, agar Rossiya "bu mavzu yopilmasa", Qozog‘iston, Armaniston va boshqa qo‘shni davlatlar bilan muammoga duch kela boshlaydi.

Boshlovchining Rossiyaning Qozog‘iston bilan qanday muammolari bo‘lishi mumkinligi haqida so‘raganida, Tolstoy shunday javob berdi:

"U yerda ma’lum bir qozoq davlati qurilmoqda, mustaqillik haqidagi milliy mifologiya gullab-yashnamoqda".

Misol tariqasida, Tolstoy boshlovchiga Qozog‘iston rasmiylarining lotin alifbosiga o‘tish g‘oyasini diqqat bilan ko‘rib chiqishni maslahat bergan. Deputat qozog‘istonliklarni o‘z tarixini “qayta yozish”da aybladi.

“Men Pavlodardagi rus o‘qituvchilarini bu shaharni ruslar qurgan, deyishsa, kechirim so‘rashga majbur qilishlariga qarshiman. Va men ularning Olmaota bizning Verniy shahrimiz, rus kazaklari qal’amiz ekanligini unutishlariga qarshiman. Siz butun yerni Xitoyga, barcha mineral resurslarni inglizlarga sotgan bo‘lsangiz ham, baribir qo‘shnilaringizdan ajralib turmasligingiz kerak, qo‘shnilaringiz bilan yaxshi munosabatda bo‘lishingiz kerak”, degan rossiyalik siyosatchi.

Tolstoy 2022 yil yanvarida namoyishchilar va hukumat kuchlari o‘rtasida keng tarqalgan tartibsizliklar va to‘qnashuvlar fonida KXSHT qo‘shinlarining Qozog‘istonga kiritilishiga ishora qilib, "Biz ularni qutqardik", deb  qo‘shimcha qildi.

Qozog‘iston tomonidan Tolstoyning so‘zlariga munosabat allaqachon yangradi. Mamlakat parlamenti deputati Murat Abenov Rossiya parlamenti vitse-spikerining bayonotlarini “provokatsion” va Rossiya uchun zararli deb atadi. Qozog‘iston Senati spikeri Maulen Ashimbayev esa Tolstoy shaxsiy shaxs sifatida gapira oladi, degan fikrni bildirgan.

Eslatib o‘tamiz, o‘tgan yilning noyabr oyida Pyotr Tolstoy sobiq Sovet ittifoqiga kirgan davlatlarda, xususan, O‘zbekistonda Rossiyada ishlayotgan migrantlar hisobidan rus tilida o‘qitiladigan maktablar qurishni taklif qilgandi. “Yuksalish” umummilliy harakati raisi, Oliy Majlis deputati Bobur Bekmurodov  Tolstoyning "da’vat"lariga javob qaytarib, O‘zbekiston deputat Pyotr Tolstoyning tomorqasi emasligini aytgandi. “Milliy tiklanish” demokratik partiyasi Markaziy kengashi raisi, Oliy Majlis Qonunchilik palatasi spikeri o‘rinbosari Alisher Qodirov esa O‘zbekiston ham Pyotr Tolstoy ilgari surayotgan yo‘ldan borsa, mamlakatdagi o‘zbek tilida so‘zlashmaydigan xodimlarni ishdan bo‘shatishi  kerak bo‘lishini, lekin bu mamlakatning tanlagan yo‘liga to‘g‘ri kelmasligini aytgandi.